Ich Ulrich der Swarcz mein hausfraw und all unser baider eriben verjehen, daz wir ze chauffen haben geben unserm libem gna^edigen herren hern Ru^egern von Starchenberch und allen sein eriben unsern hof ze Riczsteig und unser zwai tail zehencz auf demselben hof und ist auch gelegen in Helmanso^eder pharr. Wir haben in auch den egenanten hof und zehent cze kauften geben mit allen der rechten alz wirs von in ze lehen haben gehabt, und auch mit allen den ern rechten und nu^eczen di zu dem vorgenanten hof und zehent geho^ernt, auz unser nucz und gewer in di iren umb ein gelt dez wir gancz und gar geriht und gewert sein an allen unsern schaden, also mit auzgno^emen warten, daz wir noch dhain unser eriben und nachomen fu^erbaz ewichlich nimmermer dhain ansprach noch zuversicht nach dem egenanten hof und zehent gehaben noch gewinnen su^ellen noch mugen wann wir gancz und gar darumb fu^erziht getan haben, also verziht verkauffens und dez landz recht ist ob der Enz. Wir sein auch dez egenanten hofs und zehencz alz ez oben an dem brief geschriben stet ier rechter gewern und ir fu^erstant fu^er all ansprach an aller der stat da in sein not und durft geschicht also dez landz recht ist ob der Ens. Auch ist ze merkchen daz ich vorgenanter Ulrich Swarcz mein hausfraw und all unser eriben den egenanten hof und den zehent alz ez vorgeschriben stet verkauft haben mit meiner libm pru^eder Eberleins und Leben der Swarczen und mit aller irer eriben willen und wartt. Und daz di red also sta^et und unzebrohen beleib, daruber so geben wir den brief versigelt ich egenanter Ulrich der Swarcz mit meinem anhangunden insigel, und ze einer pezzern sicherait und zeugnu^ezz under unserz libm gna^edigen herren hern Hansen von Trawn und under unserz libem vetern Sigharcz dei Swarczen und under unsern sunderm frewncz Leben dez Stetna^er anhangunden insigilln, darunder ich mich egenanter Eberlein und Leb di Swarczen und all unser eriben verpinden mit unsern trewn, alz daz sta^et ze haben daz vor an dem prief geschriben stet wann wir zder zeit aigner insigillen niht gehabt häben. Der prief ist geben nah Kristz gepu^erd uber drewczehen hundert jar darnah in dem sibenczkistem jar am nagsten phincztag vor sand Gregory tag in der vasten.

Source Fulltext: OÖUB 8 (Wien 1883), S. 460f., Nr. 465