Wir Albrecht und Leupolt gebru^eder von Gotes gnaden herczogen ze O^esterreich ze Steyr ze Kernden und ze Krain graven ze Tyrol etc. bekennen und tu^en kunt offenleich mit disem brief, als weilent der hochgeborn furst unser lieber bru^eder herczog Rudolf von O^esterreich dem Got gnad, unserm getrewn Hannsen dem Lazperga^er unser des egenanten herczog Leupolts marschalich und Rudolfen seinem sune und iren erben unser vest und herschaft ze Ullen mit leuten gu^etern gerichten und mit allen andern zugeho^erungen verseczet hat zu ainem rechten werenden phande fu^er vierczehenhundert mark zalperner gu^etrr und geba^er meraner mu^ensse, desselben gelts unser egenanter bru^eder selig dem vorgenanten Rudolfen dem Lazperga^er gab von besundern gnaden tausent mark ze heyrat gu^ete durch der getrewn dinste willen die der obgenant Hanns Lazperger sein vater im und uns getan hat, und die vierhundert mark er im schuldig was umb die dienst die er im und uns getan hat gen Bayrn und gen Fryaul mit einem erbern gewaffenten volk als das alles völlikleich beweiset der saczbrief den unser egenant bru^eder sa^elig daru^eber gegeben hat, daz wir auch gunstikleich angesehen haben die erbern und namlichen dienst die uns der egenant Hanns Lazperger sta^etes getrewlich tu^et, und haben darumb im dem egenanten seinem su^en und iren erben den vorgenanten satz ze Ulten und den saczbrief den in unser obgenanter bru^eder selig daru^eber gegeben hat vernewet und besta^ett, vernewen und besta^etten auch wissentleich mit kraft dicz briefs mit allen den pünten stukhen und artikeln die in demselben saczbriefe verschriben und begriffen sind und wellen vestikleich, daz er bey seinen kreften sta^et und vest beleiben an alle widerred und geverd. und des ze urkunt und sicherhait hiessen wir unsre insigel henken an disen brief, der geben ist ze Potzen an samstag vor esto michi nach Kristes gepurd drewczehenhundert jar darnach in dem sibenczigistem jare.

Source Fulltext: OÖUB 8 (Wien 1883), S. 458f., Nr. 462