Ich Chu^onrat weilent chaplan ze Pewerhach vergich offenbar an dem brief allen den di in sehent oder ho^erent lesen, daz ich mich gar und gantz auf ein gantz end verriht han mit meinem lieben herren hern Lienharten dem Poppenperger umb di chapplaney und umb all sach di ich mit im ze handeln het also, daz ich und all mein frewnt nimmer mer chain ansprach schu^ellen gehaben noch gewinnen noch chainen chrieg weder mit reht wie di genant sein noch an reht gein im oder gein seinen erben weder umb di chapplaney noch umb anders ihts, und schul mir daz drittail hewr nach volgen an all hindrung. Darumb zu^e einer sta^etichait und zu^e einer urchu^end gib ich im den brief versigelten mit dez erbern herren hern Albrehtz abt ze Aspach anhangunden insigel im und seinem gotzhaws au allen schaden. darunder verpint ich mich mit meinen trewn wan ich jetzunt niht aigens insigels han, alles daz stet ze haben und ze volfu^ern daz an dem brief geschriben ist. Daz geschach nach Christes pu^ort dreizehen hundert jar und in dem sibentzigstem jar an dem freitag ze mitter vasten.

Source Fulltext: OÖUB 8 (Wien 1883), S. 465f., Nr. 469