ICH Jorig der Puchla^er vergich und tu^en kund offenlich mit dem brief umb di vancknus darin mich der edl graf Hainrich von Schawnberg gehabt hatt, der mich ledig gelassen hatt durich seins ohaims des edlen herren Purckhartz purckgrafen zw Maidburg und graf zw Hardegk meins gnadigen herren pet willenn, das ich dem vorgenanten graf Hainrichen darumb gelobt han mit mein trewn an aydes statt und verpind auch mich mit dem brief, das ich furwass wider in nymermer tu^en will und das ich auch von der egenanten vancknu^es wegen nyemant dester veintter sein will, und durich pesser sicheraitt han ich darumb gesatzt mein paid brueder Stefan und Pettern die Puchla^er zusambt mir und verjechen auch wir die lobt und verhaissen haben, (sic) und wir verhaissen auch mit dem brief das im das von dem egenanten Jorigen unserm brueder alles das statt gehalten werde das vorgeschriben stett an alles gevar. Und daruber geben wir im den brief zw ainem urkund mit unser obgenanten dreier prueder der Puchler anhangunden insigl, und mit des vorgenanten graf Purckharts insigl. Der brief ist geben nach Kristi gepu^ertt drewzechenhundertt jar darnach in dem sibentzigisten jaren an sand Anthoni tag.

Source Fulltext: OÖUB 8 (Wien 1883), S. 447, Nr. 453