ICH Andre von Haunsperg und mein hausvrawe und alle unser payder erben verjehen, daz wir mit gesampter hant verchaufft haben unsern hof genant der Payerhoff da zder zeit Friderich aufgesessen ist und der gelegen ist in Neunmarchter pfarr und der unser vreys aygen gewesen ist, und darzu unser gut datz Erling da zder zeit Jacob aufgesessen ist, und daz gut datz Po^esenberig da zder zeit Ulreich aufgesessen ist und die paydew gelegen sint in Guttawer pfarr und die auch unser vreys aygen gewesen sint, den erbern purgern dem rat und den gesworn und der gemain zder Vreinstat und der ewigen mess die die erbern purger gestyfft habent von Mathez von Nadelnpach pfeningen die er den vorgenanten purgern hintz irn trewen enpholhen hiet dem Got genad, daselben in sand Kathrein chirchen auf sand Wentzlas und sand Jo^ergen altar auf der porchirchen, und hern Chunrat dem Semelroken zder zeit capplon dezselben altar und allen sein nacho^emen die nach iem chu^enftig capplon sint dez vorgenanten altar, umb hundert pfunt und umb||
dreizzik pfunt alter wienner pfening der wir gantz und gar zu rechten ta^egen gericht und gewert sein. Wir haben in auch den vor¬genanten hoff mitsampt den vorgenanten zwain guttern verchaufft mit allem dem daz darzu geho^ert, und haben in die auch geantwu^ert auz unser nutz und gewer in ir nutz und in ir gewer mit allen den nu^etzzen ern rechten und diensten die davon bechomen mu^egen und alz wir sew und unser vorfordern her gehabt haben in nu^etz und in gewer also mit auzgenomener red, daz si fu^erbaz damit schaffen schu^ellen allen irn fru^em wie si verlust alz mit anderm irm aygenhafften gut mit unserm gu^etlichen willen, und schu^ellen wir sew daran nichtz irren noch hindernt (sic) weder mit recht noch ane recht. Wir sein auch dez egenanten chauffs auf den egenanten gu^ettern ir gewer an aller stat ze hoff ze tayding wo in dez not und du^erfft geschiecht fu^er alle ansprach und chrieg nach dez landez recht in O^esterrich. Tett wir dez nicht waz in daran abgieng mit ain rechten, wittan schaden si dez nemen den der erberigen pu^orger ainer oder der capplon pei irn trewen ungesworn und unberecht gesprechen mo^echten, denselben schaden mitsampt dem haubtgut schu^ellen wir in ablegen gantz und gar und schullen si daz haben datz unsern trewen und auch auf aller der hab, die wir haben inder lantz und auzzer lantz versucht und unversucht, und schullen si uns darauf phenten ane allez gericht und fu^erpo^ett wo si uns und unser hab anchoment, auf lant auf wazzer in stetten und auf panmarchten, umb haubtgu^et und umb schaden mit unserm gutlichen willen, und schullen si dez unengolten sein gen allen herrengerichten noch chain vintschafft darumb haben von uns noch von unsern wegen. Daz den erbern purgern dem rat und den gesworn und der gemain zder Vreinstat und der ewigen mess die die egenanten purger mit Mathez von Nadelnpach pfeningen gestyfft haben auf sand Wentzlaz und sand Jo^ergen altar, und hern Chunrat dem Semelroken zder zeit capplon dez selben altar und allen sein nacho^emen die nach im chu^enftig capplon sint dezselben altar die red und die wandlung also stett und untzerprochen beleib, daruber so gib ich obgenanter Andre von Haunsperg und alle mein erben in den offenn brief versigelt mit meim anhangunden insigel, und zu ainer zeugnu^esse versigelt mit meins lieben o^eheim hern Ulreichz dez Anhanger anhangunden insigel und mit meins lieben swager hern Veytz dez Anhanger anhangunden insigel und mit meins lieben oheim Marchartz dez Sluzzelberger anhangunden insigel und mit dez erbern edeln herren hern Jansen von Trawn zder zeit haubtman zder Vreinstat anhangunden insigel. Der brief ist geben da man zalt nach Christes gepu^ertt dreutzzehen hundert jar und darnach in dem su^ebentzikistem jar an sand Margreten tag der heyligen junchvrawen.

Source Fulltext: OÖUB 8 (Wien 1883), S. 476ff., Nr. 481