Wir Karle von Gotes gnaden romischer keyser ze allen zeiten merer des reiches und kunige ze Beheim bechennen und tu^on chunt offenlich mit disem briefe allen den die in sehent lesent oder horent lesen, wan die hochgebornen Albrecht und Lupolt herczogen zu O^esterreich etc. unser lieben sune und fu^ersten der pro^ebstey und der stifte in sand Stephans kirche ze Wienn dem probste den korherren und dem capittel daselbs gegeben gefu^eget und veraint habent zu einer ewigen steten unwiderru^efflichen gabe ir mautt ze Mautthausen mit dem mautthause daselbs die von uns und dem reiche ze lehen ru^erent, mit allen iren nuczen rechten frayhaiten wirden eren und loblichen gewonheiten alz das in iren briefen die si in daruber gegeben habent vo^ellichlich begriffen ist, und uns gebetten habent daz wier alz ein romischer keiser und derselben mautte und des mautthauses obrister ordenlicher und naturlicher lehenherre sulche gabe und veraynunge zu confirmieren und bestettigen und denselben dem probste den korherren dem capittel und der stifte die eygenschaft derselben mautte und des mautthauses zu geben und zu ynleiben genedichlich geru^ochten, des haben wier durch manigvaltige liebe trewe und fruntschaft die wier zu denselben unsern sunen haben ire bette genedichlich erho^eret und mit wolbedachtem mu^ote mit gu^otem und eintra^echtigem rate unsrer und des reiches fu^ersten edeln und getrewn die egenante gabe und veraynung gewillet gelobt confirmieret und bestettiget, willen loben confirmieren und bestetten si mit rechter wizzen von keiserlicher mechte volkomenheit und geben ouch und ynleihen den egenanten dem probste den korherren dem capittel und der stifte die eygenschaft derselben mautte und des mautthauses in aller der mazze und weise ewichlich zu haben und zu besiczen, alz der egenanten unsrer sune briefe lauttend die si in daru^eber gegeben habent alz vor geschriben stet, von uns unsern nachkomen an dem reiche ro^emischen keisern und ko^enigen, unsern amptluten und getrewen undertanen ungehindert. Und darumb so gebieten wier allen fu^ersten geistlichen und weltlichen grafen freyen dinstluten rittern knechten richtern gemeinscheften der stette und allen andern unsern und des reiches amptluten und getrewn undertanen die nu sein oder in zeiten werden, daz si alle noch ier dheiner die egenanten den probst die korherren das capittel und die stift an derselben mautte und dem mautthause und an allen ieren nuczen rechten freiheiten und zu^ogeho^erungen nymmer in dheinen zeiten hindern irren noch beschedigen sullen, sunder si sullen si dabey von unsern und des reiches wegen getrewlich behalten schirmen hanthaben und schuczen, alz offt si des von in oder ieren wegen ermanet werden alz si unsere und des reiches swere ungenad vermeiden wollen. Mit urchund dicz briefs versigelt mit unsrer keiserlichen majestat insigel. Geben zu Prag an sunntag nach sand Michels tag nach Kristes gepurd tausent dreihundert und in dem aynen und sibenczigisten jaren unserr reiche in dem sechs und czweinczigisten und des keisertums in dem sibenczehenden jaren. Per Cesarem.

Source Fulltext: OÖUB 8 (Wien 1883), S. 550f., Nr. 555