Wir Albrecht von Gotes gnaden herczog ze O^esterreich ze Steyr ze Kernden und ze Krain graf ze Tyrol etc. tu^en chunt umb die gu^eter die unser getrewn liben Wolfger Ulrich und Hans die Dachsperger gebru^eder an aim tail und Hainrich und Gundakcher ier vettern an dem andern tail von uns ze lehen habent und die si mit einander getailt habent, daz si dieselben gu^eter mit unsrer hant gunst und gu^etem willen einander gemacht und gefu^ogt habent also, weder tail vor dem andern abget und stirbt an leiberben, daz dann die egenanten gu^eter auf den andern tail erben und gevallen sullen von uns inneczehaben und zenu^ezzen alz lehens und landes recht ist, uns unserm liben bru^eder herczog Leuppolt und unsern erben unschedlich an den rechten die wir pillich daran haben sullen. Mit urchund dicz briefs. Geben ze Wienn an phincztag nach sand Vincenci tag nach Christs gepu^erd drewczehenhundert jar darnach in dem ainen und sibenczigistem jare.||
Marschalcus provincie.

Source Fulltext: OÖUB 8 (Wien 1883), S. 505, Nr. 511