ICH Simon der Wunberger und mitsampt mier all mein erben sun und to^echter wier verjehen, das wier ze chaufen haben geben der erbern junehvrauen Elspeten der Riienntingerine und allen irn erben unser hoff genant der Vollnhof und ain hofstat dapey gelegen in Munispacher pharr und das guet var der Awe gelegen in Altenpurger pharr das unser vreys aigen ist gewesen, um an czwai vierczig phunt wyenner phenning der wier gancz und gar gericht und gewert sein ze rechten taegen an schaden. Wier haben in auch dye selben gueter geben ledichleich und unverchumert mit allen den gulten und nuczen und rechten als sy darzu^e gehorent, in alle den rechten als wier und unser erben ezz manich jar und tag inne gehabt haben und in rechter aygenschaft herpracht haben. Wier schullen auch der vo^ergenanten gueter ir gwer und scherm sein fu^er all ansprach wo in des durft geschicht, als aygens recht ist. Taett wir des nicht wiegetanen schaden sy des nement mit recht, den ir ains pey seinen trewen gesprechen mag, den sullen wir in ablegen. Wier tuen uns auch des aygens und der obgenanten gueter furczicht lauterleichen also, dazz wier nach all unser erben niemant icht darauf ze sprechen schullen haben vil nach wenichk, mit recht nach an recht und wier antwu^erten in ezz auch aus unser gwer in ier nu^ecz und gwer. Und das in das alles staet und unczebrochen beleib als vo^er geschriben ist, daru^eber so gib ich vo^ergenanter Simon der Wunberger fu^er mich und fu^er all mein erben der vo^ergenanten Elspeten der Ruenntingerin und iren erben den priff besigelt und bestaet mit meinem anhangunden insigel, und mit der erbern la^eutt Jans Otteins sun von Po^esenpeug mit des willen und gunst dy wandlung geschehen ist, und Leutoltz dez Stainra^euter und Petreins des Zelhofer anhangunden insigel. Der prief ist geben nach Christi gepu^erd dreuczehen hundert jar darnach in dem czwai und subenczigistem jar an sand Ruprechcz tag.

Source Fulltext: OÖUB 8 (Wien 1883), S. 581f., Nr. 579