Wir Albrecht von Gots gnaden hertzog ze O^esterreich ze Steyr ze Kernden und ze Krain graf ze Tyrol etc. tu^on kunt umb den spruch den unser getrewer lieber Eberhart von Chapell auzgesprochen hat zwischen dem erbern geistlichen unserm lieben andechtigen probst Weyganten von sand Florian an aim taile und unsern getrewn den purgern von Ens an dem andern taile von ainer aw wegen gelegen in dem Engenhaken gegen Spilberg uber und daruber er seinen spruchbrief geben hat, daz wir denselben spruchbrief bestet haben und wellen ouch, daz es dabey beleibe in aller der mazze als er von worte ze worte geschriben stet ane gever. Mit urchund ditz briefs. Geben ze Wyenn an dem heiligen prehentag nach Krists gepurte dreuczehen hundert jar darnach in dem zway und sibenczigisten jare. M(agister) c(urie) de Liechtenstain et Johannes de Tyrnavia.

Source Fulltext: OÖUB 8 (Wien 1883), S. 563f., Nr. 564