Wir Albrecht und Leupolt bru^eder von Gots gnaden herczogen ze O^estereich ze Steyr ze Kernden und ze Krain grafen ze Tyrol etc. bekennen und tu^on kunt offenlich mit disem brief, daz wir dem erbern unserm sunder lieben Dyetreichen von Abensperg korherren ze Babenberg und pharrer ze dem spital an dem Pyern durch seiner fleizzigen pet willen und daz ouch dasselb spital dester pas fu^er kome und gepezzert werd in allen sachen alz er uns das versprochen hat, die gnad getan haben und tu^on ouch, daz das egenant Spital am Pyern von dem tag als der brief gegeben ist frey und ledig sein sol vor aller gastung uncz an unser oder unserer erben widerruffen. Da von gebieten wir ernstlich allen unsern lantherren rittern und knechten purggrafen richtern mauttern zollnern und allen andern unsern amptleuten und undertanen den diser brief geczaigt wirdt und wellen, daz si denselben von Abensperg pharrer ze dem spital am Pyern bey derselben unser gnad beleiben lazzen als da vor geschriben stat, und dawider nicht tu^on in dhainem weg. Mit urkunt dicz briefs. Geben ze Wienn an phincztag vor sand Jo^ergen tag nach Christs gepurde dreuczehen hundert jar darnach in dem drew und sibenczigistem jare.||
De Torberg et de Liechtenstain magist er curie.

Source Fulltext: OÖUB 8 (Wien 1883), S. 642, Nr. 642