Ich Wernhart von Aystershaim ritter tu^en .... und vergich offenleichen mit dem prief fur mich und all mein eriben, .... daz ich versaczt han di wis gelegen zu^e Lewpolczsto^erf und gehaizzen ist Vichterinn zu einen rechten sacz sacz recht und lancz recht ob der Ens, di emal purchrecht gewesen ist dem Achleitter und dem man alleu jar zu sand Andrez tag zu purchrecht gegeben und geraicht hat sechz phening und czway hu^ener gen Everdinge in ain haws in weliches man si vodert und anders nyndert, Thoman dem Santperiya^er Agnesen seiner elichen hawsfrowen und iren eriben umb zwelif phund wienner phenning der wier gancz und gar von in gericht und gewert sein warden an allen schaden mit der weschayden, wer pezzer erib well sein der hat vollen gewalt di obgeschriben wis ze losen umb di obgenanten zwelif phund winner phenning ja^erleichen auf sand Jorigen tag, dem schol di losung nyman vercziechen noch in nichtew hindern. und all di weil di losung nicht geschiecht so schol ich obgenanter Wernhart von Aystershaym und all mein eriben dez sacz ier rechter gewer sein nach sacz und lancz recht ob der Ens; und waz in an der gewerschaft ab get, daz schallen si haben dacz mir und meinen erben dacz meinen trewn, dar czu auf aller der hab und ich hab wesu^echt und unwesu^echt. Auch ist ze merchen, ob dem obgenanten Thoman Santperiger oder seinen eriben gelcz no^et gescha^ech, so haben si vollen gewalt di obgenante wis zu verseczzen und zu verchauffen wem sew wellen oder wem sew verlust und irez geltez dovon wechomen, so . . . gst mugen. und daz in di red also sta^et und unverchert weleib dar uber gib ich obgenanter Wernhart von Ayste . . . . ritter in disen prief versigelten mit meinen anhangunden insigel und mit meinez pruder Heinreichz von A . . . . und Jacobz des Chirichperiger auch anhangunden insigeln, di si payd unverschaydenleichen zw mein . . . . . nach meiner fleizzigen pet willen mier zu ainer geczewgnuzz an disen prief gehangen habend in un . . . . . n an schaden. Der prief ist geben nach Christi gepu^erd drewczehen hundert jar darnach in dem . . . . d sibenczkisten jar dez negsten phincztagez vor dem prehentag.

Source Fulltext: OÖUB 8 (Wien 1883), S. 675f., Nr. 670