Ich Erasem Aychperger zu der zeit pfleger ze Viechtenstayn und ich Chunrat Aychperger sein bruder verjehen offenleich mit dem brief, daz wir von dez erbern unsers herren hern Otten von Zelkging von Schönnek wegen in seinen namen als er mit uns geschafft und daz empholhen hat ingenomen und emphangen haben hundert guter guldein beraitz geltz von den ersamen weisen dem burgermeister dem richter dem rat und von den purgern gemainlich ze Pazzowe, di im von in getaidingt wurden für di scha^eden di im an ettleichen rozzen und maidem oder wie sich daz gefu^egt hat widervaren sind in dem chrig der do gewesen ist zwischen unsern gena^edigen herren den hertzogen von Oesterreich und den von Bayern, davon mit dem gewallt der uns von unserm egenanten herren von Zelkging und von seinen eriben in den sachen gegeben ist sagen und sprechen wir di obengenanten burger und dew stat ze Pazzoir der egenanten guldein gentzlich ledig und los ungeva^erlich. Mit urchund des briefs der besigelt ist mit meinen Erasems insigel. Darunter ich mich Chunrat sein bruder verpind an gever wann ich di zait nicht aigens insigils enhat. Geben am prehenabent darauf daz gelt verhaizzen ward nach Christi gepürd dreutzehenhundert jar und in dem drew und sibenczkistem jar.

Source Fulltext: OÖUB 8 (Wien 1883), S. 629f., Nr. 630