Wir Albrecht von Gots gnaden herczog ze O^esterreich ze Steyr ze Kernden und ze Krain graf ze Tyrol etc. tu^on chunt, daz unsser getrewn lieben Ru^odolf Reinprecht und Fridrich gebru^eder von Walsse von Ens an aim tail, Wolfgang und Ulrich von Walsse von Drosendorf vettern an dem andern tail und Jo^ergel von Walsse von Lincz an dem dritten tail mit unsrer hant gunst und gu^oten willen einander vermachet habent alle die gu^eter die si von uns ze lehen habent und vormals nicht vermachet sind also, welicher under den vorgenanten tailn an leiberben ab get und erstirbet, daz desselben gu^eter die von uns ze leben und vormals nicht vermacht sind auf die andern tail gevallen und erben sullen, von uns unserm lieben bru^oder herczog Leuppolt und von unsern erben inneczehaben und niezzen alz lehens gemechts und landes recht ist. Mit urchund dicz briefs. Geben ze Wienn an phincztag nach sand Andres tag nach Christs gepurd dreuczehenhundert jar darnach in dem dreu und sibenczigisten jare. Dominus dux per Ch. notarium camere nunciavit et postea per se ipsum audivit in consilio.

Source Fulltext: OÖUB 8 (Wien 1883), S. 667, Nr. 664