ICH Chunrat der Mautter und ich Anna sein hausvrawe und alle unser erben wir verjehen, daz wir schuldig worden sein und gelten süllen unserra oheym hern Andre dem Grueber seiner hausvrawen und allen im erben hundert pfunt und ain pfunt gueter wienner phenning die si uns an rechter not und durch trewn willen berait gelihen habent und der wir sew an alles vercziehen richten und weren süllen von sand Jörgen tage der schirist chümpt darnach über ein gantz jare, und dafür haben wir in ze phannt gesaczt unser haws gelegen ze Aschach und was darczue gehöret, ez sein ekcher paunga^erten traidczehent wismad holcz oder swie das genant ist, daz alles gelegen ist in Harchircher pharre und von unserm genedigen herren bischof Albrecht von Pazzawe ze lehen ist, aus unserer nucze und gewer in die ir mit aller stet und herren hannt, und mit allen eren rechten und nu^eczen so die darczuegeho^erent als wir es her bracht haben also mit der beschaiden, ob wir sew irs vorgenanten gelts auf den egenanten tage nicht richten noch wern als vor geschriben ist, so habent si vollen gewalt unser vorgenants haws und was darczue geho^ert ze verchauffen ze verseczen und allen iren frumen damit ze schaffen mit unserm guetleichem willen als verr, daz si ires gelczs haubtguts und schadens gancz und gar verricht und gewert werdent. Wir sein auch des vorgenanten sacs und gueter ir rechter gewer und scherm fu^er alle ansprach wo in des not und durft geschicht nach lehens recht ob der Enns. Und wer auch den brief mit iren guten willen inne hat dem sein wir all der gelube und artikel suldig und gepunden als vor an dem brief geschriben stet; und was si in der zeit auf das vorgenant haws und hofmarich pawten ez wer mit zymer oder wie daz genant ist das ir ains bey sein trewen gesprechen mag, da su^ellen wir sew auch umb auz richten und widercheren an allen iren schaden. Und daz in die rede also fu^erbas stet und unzebrochen beleib, darüber so geben wir in den offen brief versigelt mit meins egenanten Chunrat des Mauttner anhangundem insigel, darunder sich auch mein vorgenant hausvrow Anna verpindet mit sampt mir alles daz stet ze haben daz vor geschriben stet; und ze einer pezzern sicherhait und getzeugnüzze haben wir gepeten den erbern ritter hern Ulrich den Harrocher und Albrecht den Jagenrewter, daz si irew insigel gehangen habent ze zeug an den brief, der geben ist do man zalt nach Christs geburde dreutzehenhundert jare darnach in dem vier und sybentzigistem jare an sand Margareten tage der heyligen junchvrawen.

Source Fulltext: OÖUB 8 (Wien 1883), S. 710f., Nr. 698