ICH Hainreich von Scho^ennaw vergich, daz Go^ergel der Ledrer pu^erger ze Woels reht und redleich verkauftet und ze kauffen geben hat dem peschayden Paulen dem Fleischhacker purger ze Woels seiner hausfraun und allen irn erben den zehent datz der Tann und den zehent datz Stickelperg gelegen in Talhaimer pfarr mit allen rehten und nu^etzen als er in von mier ze lehen het, umb ain gelt dez er gantz und gar verriht und gewert ist. Und also han ich auch die vorgenanten zehent verlihen dem egenanten Paulen dem Fleischhacker und Michel seim pru^eder und allen irn erben su^en und to^ehtern unverzigen meiner rehten die ich hintz allen andern mein verlehenten laeuten han. Und pin auch der vorgeschriben zehent ir rehter herr und gewer also lehens reht ist und dez landes ob der Ens. Und dez allez zu^e ainem wauren (sic) urku^end gib ich in den prief versigelt und gevestent mit meim aigen anhangundem insigel, und dar zu^e mit dez erbern mans Dyetreich dez Haunolt insigel purger ze Woels, Der prief ist geben da man zalt von Christus gepu^ert dreuzehenhundert jar und dar nach in dem vier und sybentzgosten jar an dez heiligen herrn sand Fallenteins tag in dem snyt.

Source Fulltext: OÖUB 8 (Wien 1883), S. 711, Nr. 699