ICH Agnes hern Reinprechts seligen von Waltse tochter und hern Josten seligen von Rosenberkch wittib vergich fu^er mich und fu^er alle mein erben, das ich verchoufft und gegeben han meinen lieben pru^edern hern Ru^odolfen hern Reinprechten und Fridreichen von Waltse und allen iern erben von erst mit meins lehenherren hant dez hochwierdigen fu^ersten bischof Albrechts ze Pazzow meins rechten lehens das ich von im und demselben gotzhaws ze lehen gehabt han mein vestt Vyehofen und alles daz das dartzue geho^eret, holtz vischwaid weingarten pawngarten perkchrecht czehent holden uberlent waid wismat paw. Auch han ich in verchoufft und gegeben meins rechten aigens alle die gu^eter die ich gehabt han in dem Aentzespache und alles daz das dartzue geho^eret in u^erbar, cze holtz cze veld und cze dorffe. Die vorgenanten vestt Vyhofen und alles daz das dartzue geho^eret und alle die gu^eter die ich in dem Aentzespache gehabt han mit aller ierer zuegeho^erung als vor an dem brief benant ist han ich den vorgenanten meinen pru^edern und allen iern erben recht und redleich verchouft und gegeben mit freyung und mit allen den nu^etzen ern und rechten als es mich alles von meinen lieben enen hern Christann dem druchsetzen von Vyhofen und von meiner mu^eter seliger gedechtnu^ezze angeerbt ist und als es mir an rechter tailung gegen meiner swester vrown Elzbeten von Potendorf ze rechtem erbtail gevallen ist und alz ich daz lehen in lehens gewer und das aygen in aygens gewer herpracht han nichts ausgenomen, umb dritthalbtausent phunt wienner phenning der mich die vorgenanten mein pru^eder gentzleich verrichtet und gewert habent also, daz si und alle ier erben fu^erbas die egenanten vestt und gu^eter mit aller ierer zugeho^erung und mit allen den nu^etzen ern und rechten so vor an dem brief benant und verschriben ist ledichleich und vreileich haben und allen iern frumen damit schaffen, verchouffen versetzen und geben wem si wellen an allen ierrsal. Und das der chouff fu^erbas also stet und untzebrochen beleib, daru^eber so gib ich obgenante Agnes fu^er mich und fu^er alle mein erben den vorgenanten meinen pru^edern hern Ru^odolfen hern Reinprechten und Fridreichen von Waltse und allen ieren erben den brief zu einem warn urkund und zu einer ewigen vestnung der sache versigilten mit meinem ange¬hangen insigil, und mit der erbern herren insigiln meiner lieben o^ehemen hern Eberharts von Chappeln des eltern hern Stephans und Hainreichs gepru^eder von Zelking und Eberharts von Chappeln des jungern. Der brief ist geben ze Wienne nach Christes gepu^erde drewzehenhundert jar darnach in dem vier und sibentzgistem jare an sand Jacobs tag des heiligen zwelifpoten.

Source Fulltext: OÖUB 8 (Wien 1883), S. 713f., Nr. 701