ICH Ulreich der Mu^erheimer mein hawsfrawn und alle unser eriben und nachkomen verjehen, daz wir ze chauffen haben geben und geben in auch mit dem brief unsern sitz ze Auroltz Mu^enster mit hofstat mit zimmer mit paw mit chelern mit zehent darauf, mit pawnga^erten und mit weia^ern mit grund und mit podem und mit allem dem daz darzu geho^ert, hern Johannes dem Tannberiger zu Awroltzmu^enster Barbaran seiner hawsfrawn und allen iren erben und nachkomen umb hundert pfunt wienner pfening, der si uns erberleich mit beraitem gelt verricht und gewert habent an allen unsern schaden. Wir haben in auch den vorgenanten unsern sitz geben lediglich an alle ansprach auz unser nu^etz und gewer in ier nu^etz und gewer mit aller der sta^et di darzu^e geho^ert, und auch mit allen den ern rechten gu^elten nutzen und gesuechen di von recht darzu geho^ernt oder davon bekomen mu^egen. Wir verzeichen uns auch mit dem brief dez vorgenanten sitz und guetz allez also, daz wir nach ander niemant von unsern wegen noch sust niempt fu^erbaz ewichleichen nimmer mer dhain ansprach nach vadrung darnach sullen nach wollen haben in dhainerlay weis. Taten wir ez aber daruber, daz sol wider den brief weder recht nach chraft haben trewleich an geva^er. Wir sullen auch dez vorgenanten guetz allez und chaufs ir getrew gewern, ir vertretter und ir fu^erstand sein an aller der stat wo in dez notdu^erft geschiecht. Und wa^er daz ob newer oder elter brief und urchunde herfu^erka^em, daz sol doch dannocht dem gegenburtigen brief und dem chauff unschedlich sein und dhainen schaden pringen. Ez ist auch ze merkchen, ob in dhain pruch irrung oder inva^elle an den sachen gescha^ech oder ob wir in nicht allez daz volfueren und enden ganzlich daz an den brief verschriben und mit worten begriffen ist, namen si dez icht schaden, den sullen wir in gantzleich auzrichten und widerchern und sullen si daz haben und bekomen datz uns und datz aller unser hab, und da sullen si sich selb von richten und wern mit recht oder an recht wie si verlustet nach allem irem willen und notdurften mit unserm gutlichen willen und wort. Wir bitten auch mit den gegenbu^ertigen brief all herren ir pfleger ir richter und ander ir ambtlaw^et wi di genant sind, daz si sew zu den sachen allen di an dem brief sind fuedern beschierm (sic) und besichern sullen trewleich angevar, wann si umb di sach all di an dem brief verschriben ist alle irew recht darzu all krieg di wir uns gen in fu^ernamen darumb an aller stat erlangt und behabt habent gen uns und unser hab und wir gen in ga^entzlich verlorn. Swer auch den brief mit irem guetleichen willen inne hat und fu^erpringt, der oder deu selben habent alle di recht di an dem brief verschriben sind alz ga^entzlich alz si selben. Und dez alles zu einer staten urchund der worheit geben wir in den brief versigelten mit meinem egenanten Ulreichs dez Mu^erheimer und mit meiner lieben prueder Heinreichs und Chunrads der Mu^erheimer aller anhangenden insigeln versigelt, und zu einer merrern staten zeugnu^ezze und sicherait und er dez erbern herren hern Hartneiden dez eltern Kuchler und under unsers lieben swager Thoman dez Gusters anhangenden insigeln besigelt. Under die insigel allen verpinde ich mich vorgenanten Ulreich Mu^erheimer und wir vorgenant Heinrieh und Chunrat gepru^eder unser hawsfrawn und alle unser eriben unverschaidenlich miteinander mit unsern trewn an aydes stat trewleich wor und sta^et ze haben allez daz an dem brief verschriben ist. Der brief ist geben do man zalt von Christi gepu^erde dreutzehenhundert jar und darnach in den fu^emff und sybentzkisten jar an sand Michels tag archangeli.

Source Fulltext: OÖUB 8 (Wien 1883), S. 778f., Nr. 755