Wier Albrecht von Gotes gnaden herczog ze O^esterreich ze Steyr ze Kernden und ze Krain graf ze Tyrol etc. tu^on chunt offen¬lieh mit disem brief, als unser getrewr lieber Ru^oger von Starhem¬berg der junger die veste Lobenstain mit acht und fumfczig phunden phenning geltes gelegen in Zwetlinger und Obernewnkircher pharr oder wa si ligen, die im an seinem taile zu^o der egenanten veste gevallen sind und dieselb vest und die phenning gu^olte alle er von uns ze lehen hat, unserm getrewn lieben Ru^ogern von Starhemberg dem eltern seinem vettern verseczt hat fur tausent phunt wienner phenning also, daz derselb von Starhemberg der junger oder seine erben denselben satz wider an sich ledigen und lo^esen sullen und mugen vierczehen tag vor den nechsten ku^enftigen phingsten, und ob des nicht geschech daz denn darnach der sacz vercziket sei und der vorgenant elter von Starhemberg und sein erben die egenant veste mit der phenning gu^olt furbaz von uns in lehens weise niezzen und innehaben als landes und lehens recht ist ungeverlich, daz wir zu demselben sacz und den egenanten gedingen unser willen und gunst gegeben haben und geben auch wizzentlich in aller mazz als vor geschriben stet an allez gever. Mit urchund dicz briefs. Geben ze Wienn an sand Ulreichs tag nach Kristes geburt dreuczehenhundert jar und darnach in dem fümf und sibenczigisten jare. Magister curie de L(iechtenstein).

Source Fulltext: OÖUB 8 (Wien 1883), S. 768, Nr. 746