Ich Gedraut von Winden hern Offen tachter von Orwerchk vergich, daz ich gegeben han meinem lieben wirt Hannsen von Winden mein rechtew morgen gab, di mir mein seliger wirt Erasem von Pernnekk dem Got gnad gegeben hat, und dez sind ain und czwainczig marchk gelts und di da ligent in den Pucheln pey Wetschein mit alle deu und darzu gehort wesucht und unbesucht mit allen den rechten als ich ez gehabt han und als mein morgen gab prif sagt den ich darumb han und den ich mit guten willen meinem wirt Hansen von Winden in han geanttwurt und geben also mit auzgenommer red, ob mich mein wirt Hanns uber lebet, so sol di vorgenant mein morgen gab und di guter sein sein und ander nymands und allen seinen frum da mit schaffen als mit andern seinem aygen gut; wer aber daz ich in uber lebt und er ee ab ging den ich, so schullen di vorgenanten guter morgengab wider mein sein und mag di geben und schaffen wem ich wil nach meinem willen, daz im daz so mir stet und unczeprochen peleyb, dar uber gib ich im den prif versigelt mit meinem aygen anhangundem insigel und mit hern Fridreichs von Leybencz und hern Weycharts von Polhaim und mit Rudieins und Mertleins pruder von Pernnekk anhanglinden insigelen. Der prif ist geben nach Christi gepurd dreuczehen hundert jar dar nach in dem fumf und sybenczigisten jar an sand Erasmi tag.

Source Fulltext: OÖUB 8 (Wien 1883), S. 762f., Nr. 740