Wir graf Hainrich von Scheunberch bechennen offenleich mit dem brief fu^er uns und unser erben undt nachchomen, daz uns der ersam herr aept Altmann ze Nidernaltach und der convent daselbs beweist habent mit gueten briefen und urchundten dy si habent lang her gehabt von unsern vorvodern über die vreyung wie vass undt wein undt schüffung, di si auf und ab bringent an unser mautt ze Aschach also, daz si von denselben vassen es sein neu oder alteu di si neu fürent auf flözzen oder schiffen undt swaz darzu gehört von panden und wez si zu irren pressen bedürffen, und her engegen ir weyn undt schef undt gut undt auch hausen oder anderlay visch zu der vasten und auch die vel iren convent ze pfrünt pelzen frey sinen sulln an all mautten swen si weJlent in dem jare, daz si uns noch unsern mauttern da von nicht mer geben sullen denn das alt recht daz ist zwelf wienner pfenning ze letz und der vertiger sechzechen wienner pfenning, daz recht von dem poden. wir haben in auch ze voderist durich Gott und ürs andechtiges gebetes willen uns unsern vorvodern undt nachkhomen zu hail undt sald die gnad getan, ob daz wäre daz wir unser vorgenant mautt versetzen ze Aschach oder verchaufften swenn datz wär oder under uns tailten, des sullen si oder ir gotzhaus zu Nidernaltach an ir egenanten freyung unengelten beleiben gar und genzlich. Wir gehaissen auch in undt iren closter, daz wir mit treuen ir leut undt guet und irer schef beschürmen wellen so wür pest iniigen, darumb si uns auch jerlich gebent vier pfunt alter wienner pfenning von iren aigen ze SchonHering alz di brief sagent di wür von yn darüber haben. darüber ze einen ewigen urchund und bestätigung geben wir in den brief für uns undt aller unser erben und nachkhomen versigleten mit unsern grossen anhangenten insigel, der geben ist zu Scheunberch an mittichen vor sand Marie Magdalene tag da man zalt nach Christi geburt dreuzechen hundert jar undt darnach in dem fünf und sübenzigisten jare.

Source Fulltext: OÖUB 8 (Wien 1883), S. 769, Nr. 747