Ich Jans von Trawn ze der zeit haubtman zeder Vreinstat tun chunt, daz fu^er mich chomen sind vrow Peters Chu^enrats des Pawmschaben saeligen witib und Seydel des selben Pawmschaben prueder und sein drey swestern Ped Margreten und Elspet fu^or sew und alle irew frewnt und helffer an ainem tail, und Chunrat der Paestel purger zeder Vreinstat an dem andern tail umb di inczicht so man den selben Chunraten den Paestlein getan hat umb des egenanten Chunraten des Pawmschaben tode; nu was der selb Chunrat Pestel fu^er mich chomen und erpot sich des, er wolt sich der selben inczicht auz reden in der lanntschranen als des landes recht waer. Darnach sind si an peden tailen ga^enczlich und unbedwungenlich hinder mich gegangen, da erber lewt her Ott von Walde Ott der Vewchter Jans der Chu^erbiczer di zeit mein lantrichter zeder Vreinstat und di erbern purger des rats daselb zeder Vreinstat bei mir gewesen sind, und hat si der egenant Chunrat Paestel daselbs var mein erberchleich geweist daz er der inczicht umb den egenanten todslag unschuldig ist. Und darnach han ich darumb gesprochen nach der egenanten erbern lewt rat und han si frewntlich miteinander bericht also, daz si den oftgenanten Chunraten Paestlein umb die inczicht des todslages gaenczlich ledig habent lazzen, und sol auch furbaz von in iren frewnten und helffern nach von ander niemant chain zu^espruch nach veintschaft nicht mer haben, oder wer daz under in uberfuer ez sei mit warten oder mit werchen der des mit erbern lewten uberweist wiert daz er ez wider geavert hiet, der ist mir oder wer haubtman zeder Vreinstat ist zehant hundert phunt phenninge vervallen, des habent si mir ir trew gegeben an aydes stat. Mit urchund des briefs den ich daruber gib mit meinem anhangunden insigil und mit den egenanten erbern Otten von Walde Otten des Vewchter Jansen des Chu^erbiczer anhangunden insigeln, di alle bei dem spruche und handlung gewesen sind und des geczeug sind mit irn insigeln. Der brief ist geben zeder Vreinstat nach Christes gepurde drewczehen hundert jar darnach in dem fu^enf und sybentzkistem jar am mitichen var sand Lucein tag.

Source Fulltext: OÖUB 8 (Wien 1883), S. 790f., Nr. 764