Ich Go^eschel der Lerbu^eler und ich Chu^entz der Steger wier vergehen, daz wir die vest ze Weydenholcz mit lauten und mit gu^eetern mit pu^erchrecht zinsen zehenden gu^elten nu^etzen und va^ellen, mit holcz mit veld mit waid mit wazzern mit vischwaiden mit gerichten wirden und eren und gemainchleich mit aller zuegeho^erung alz daz alles von weilent U^elreichen dem Weydenholczer an uns chomen ist und alz er daz vormalen bey seinen lebenden zeiten inngehabt hat, recht und redleich verchau^efft haben und verchauffen auch wizzentleich mit disem briefe fu^er uns und alle unser erben dem hochgeporn fu^ersten unserm lieben gena^edigen herren hertzog Albrechten hertzogen ze O^esterreich etc. und seinen erben umb tausent phunt wienner phenning der wir von im gancz und gar verricht und gewert sein und die zu unserm nu^ecz und notdu^erft cho^emen sind. Und wann wir uns gein dem egenanten unserm herren hertzog Albrechten und seinen erben vertzigen haben der egenanten vest und aller ierr zuegeho^erung und auch aller der rechten vodrung und ansprach die wier dar zu^e gehabt haben oder gewinnen mo^echten, da von geloben wir pede fu^er uns und unser erben und erbes erben ewikchleich, daz wir disen chauff statt haben wellen vestikchleich und dawider nymmer tu^en wellen noch schaffen getan in dhainen wegen, und daz wir auch dezselben unsers herren dez hertzogen und seiner erben der obgenanten vest Weydenholcz und ierr zugeho^erung fu^er uns und unser erben alle recht scha^erm und gewer sein sullen und wellen nach landes recht ungeva^erlich. Wir sullen und wellen auch dem vorgenanten unserm herren hertzog Albrechten anttworten und geben den gescha^efftbrief und alle ander brief die wir dhains weges haben oder noch gewinnen von der egenanten vest wegen ze Weydenholcz und ierr zu^egeho^erung . . . Dez ze u^erchund und sicherhait haben wir fu^er uns und unser erben unsere insigel gehenchet an disen brief, und haben darzue zu^e merrer sicherhait und geczeugnusse gepeten die erbern und vesten herren Wernharten den Aistershaimer hern Hansen den Maw^erlein und hern Ulreichen von Ro^erbach zu der zeit lantrichter ob der Ens und Lentlein den A^eschpeyn, daz si ire insigel zu den unsern gehenket haben an disen brief . . , Wir die vorgenanten vier bechennen daz wir die egenanten unsere insigel zu einer pessern sicherhait und geczeugnusse dez vorgenanten chauffes gehenket haben an disen brief, . . der geben ist ze Wienn an sand Andres tag dez heiligen zwelifbotten nach Kristes gepu^erd dreutzehen hundert jar darnach in dem fumff und sibentzkistem jare.

Source Fulltext: OÖUB 8 (Wien 1883), S. 789f., Nr. 763