Ich Wernhart von Aystershaim vergich, daz ich fur mich und alle mein erben aufgeben han und gib auch auf wissentlich mit disem brief dem durchleuchligen hochgeborn fu^ersten meinem lieben genedigen herren herczog Albrechten herczogen ze O^esterreich ze Steyr ze Kernden und ze Krain grafen ze Tyrol etc. die veste ze Scho^enhering mit aller zugeho^erung alz si mit chauff an mich chomen ist und ich die unczher in nucz und gewer genozzen und innegehebt han die mein rechts aygen gewesen ist. So hat derselb mein genediger herr dieselben vest mit aller zu^ogeho^erung alz oben begriffen ist mir und allen meinen leiberben su^onen und to^echtern herwider verlihen von seinen genaden nach sag des lehenbriefs den er mir daruber geben hat, und hab auch ich die zu rechten lehen von im emphangen und aufgenomen fu^er mich und alle mein erben von im und seinen erben herczogen zu O^esterreich in lehens weis inneczehabend und ze niessend als lehens und landes recht ist ungeverlich. Ich und alle mein erben sune und to^echter sullen auch dem vor genanten meinem herren herczog Albrechten und allen seinen erben herczogen ze O^esterreich die egenant vest offen haben und in damite gewertig sein zu allen iren no^etten wider allermenklich nyeman auzgenommen doch an unsern merklichen schaden ungeverlich. Und sullen in auch davon getrew und gewer sein iren frumen ze furdern und iren schaden ze wenden allenthalben nach allem unserm vermugen alz lehensmanne iren lehenherren pilleich und ze recht tun sullent an allez gever und arge liste. Und des zu urchund so gib ich dem vorgenanten meinem genedigen (herren) herczog Albrechten und seinen erben disen prief versigelten mit meinem anhangendem irisigel, und hab ouch erbeten den edeln herren hern Hainreichen von Walsse von Ens ze der zeit hanptman ob der Ens hern Dyetreichen von Aystershaim meinen vettern und Hainreichen von Aystershaim meinen bru^oder. Der brief ist geben ze Wienn an aller heiligen tag do man czalte von Gotes geburt dreuczehenhundert jar und darnach in dem fumf und sibenczigistem jar.

Source Fulltext: OÖUB 8 (Wien 1883), S. 783f., Nr. 758