Ich Fridreich der Wasna^er vergich, daz ich han auf gegeben ledichleich fu^er rechtz aigen den durichla^euchtigen ho^echgeborn ffu^ersten und herren, meinen lieben gena^edigen herren hern Albrechten und hern Leuppolten gepru^edern herczogen zu O^esterreich etc. mein gesa^ezz dacz dem Wasen, dapei dreu gu^et ze Weydach einen hof ze Staindorf und alleu andreu meine gu^et di mein rechtz aigen gewesen sind wie di genant sind, di gelegen sind in irm lannd ze O^esterreich und in der herschaft zu^e Schaunberkh mit allen ern rechten und nuczen alz ich si inn gehabt und genozzen han, und habent auch di also von mier in so^elhen genaden auf genumen daz si mier di gena^edichleich herwider zu rechten lehen verlihen habent, und scho^ellen und wellent auch fu^erbaz ewichleich si und ir eriben und nachchomen di allen meinen eriben su^enn und to^echtern verleihen. Si scho^ellen auch der obgenanten lehen und anderr lehen di wier auch von irn genaden haben unser gena^edig herren gewern und scherm sein alz irs lanndes recht ob der Ens ist. Si habent uns auch von sundern genaden erlaubt ein vest auf ze vahen und ze paun auf unserm gruntt dez obgenanten gesa^ezz dacz dem Wasen oder an einer andern stat auf unserm gruntt wa uns daz aller fu^egleichist wirt, daz wier ze lehen von iern genaden haben und daz in ierm obgenanten lannd zu^e O^esterreich gelegen ist, und da scho^ellen si uns zu scherm und unrechtes gewaltes vor sein. Und dar umb so loben und gehaissen wier in, daz wier in von der obgenanten lehen und vesst wegen getrew und gewa^er scho^ellen und wellen sein ieren frum allenthalben werifen und iern schaden understen nach allen unserm vermo^egen ungevarleich nach lehens recht mit ganczen trewn. und ob wier di vesst auf vahen und wann wier di gepawt haben so scho^ellen wier sei dann unsern obgenanten gena^edigen herrn offen haben und in da mit warten zu^e allen iern no^ettu^erften und si und di iern dar in und daraus lazzen und auch dar inn behalten wider aller ma^endleich niemant auzgenumen alz lehenmann ier lehenherren pilleich und ze recht tu^en scho^ellen, und doch an unsern merkhleichen schaden an alz geva^er. si habent uns auch mit iern genaden und trewn gelobt daz si di obgenanten lehen niemant anders geben noch ze leihen erlauben scho^ellen noch wellen, nu^er si wellen und mainen si selb ze haben und ze leihen, und wann si nimmer schollen sein da Got lanng vor sei, so scho^ellen si beleiben pei iern eriben oder wer iers lanndes zu O^esterreich waltig wiert und obrister herr ist, und diselben scho^ellen di uns und unsern eriben leihen su^enn und tochtern alz vor verschriben ist. Dez allez zu^e u^erchund gib ich obgenanter Fridreich der Wasna^er den brief mit meinem anhangunden insigel versigelt, und zu^e einer pessern sicherhait und geczeugnu^ezz habent di erbern unser lieb nachst freunt Wernhart der Aystershaimer Leutolt der A^esspeyn Helmhart der Go^eriger mein aydm und Hillprant der Weichselberiger auch mein aydm iereu insigel auch dar an gelegt. Daz ist geschehen ze Wienn an aller heiligen tag nach Christi gepu^ert dreuczehenhundert jar darnach in dem fumf und sibenczkistem jar.

Source Fulltext: OÖUB 8 (Wien 1883), S. 782f., Nr. 757