ICH Gotfrid der Sintzenperger und mein hawsfraw wir vergehen und tu^en chunt mit sampt unsern erben, daz wir ze chauffen geben haben unsern hof ze Mayerhof genant in Talhaimer pharre gelegen dem edeln erwirdigen unserm lieben genedigen herren hern Rudolfen von Walse seiner hawsfrawn und allen seinen erben, derselbig hof von im lehen und auch dez Schachner satz gewesen ist, und haben in auch denselben hof gegeben aus unser nutze und gewer in ir nutze und gewer mit allen den eren rechten und nutzen die dar zu^o geho^erent und auch in allen den rechten, als wir denselben hof in stiller nutze und gewer unversprochen her pracht und gehabt haben, umb ain gelt dez si uns schon aller sache gentzleich und gar ze rechten taegen gericht und gewert habent also beschaidenleich, daz wir noch alle unser erben hintz demselben hof nimmer mer dhain zuspruch noch ansprach haben noch gewinnen sullen. Wir sullen und wellen auch desselben hofs ir gewer sein wo in dez not und durft geschicht. Na^emen si daruber von der gewerschaft wegen mit recht indert dhainen schaden, denselben schaden sullen wir in aller sache gentzleich und gar awsrichten. Daz die rede furbas staet und unverchert beleib, daruber gib ich Gotfrid der Sintzenperger hern Rudolfen von Walse und seinen erben den prief zu^e ainem waren urchunde der wahrhait versigilten mit meinem anhangunden insigil, und zu ainer guten getzewgnuzze mit der erbern meines o^ehaims Thomans dez Haiden und mit hern Hansen dez Glewzzer anhangunden insigiln Geben nach Christi gepurde uber drewtzehen hundert jar dar nach in dem fumf und sibentzgisten jar an sand Elspeten tag.

Source Fulltext: OÖUB 8 (Wien 1883), S. 787f., Nr. 761