Ich Thomas Hawtzenperger vergich offenlich mit dem brief, daz mich der Erwirdig fürst mein genoediger Herr Her Pilgreim Erczbischof ze Salzburch Legat des Stüls ze Rom, furderlich bezalet vnd gena^edichlich ausgericht hat, allez meines Soldes des er mir von dem Jar daz zu Pfingsten, die schierist chöment, aus get schuldig beleibet, vnd auch aller schaden, die ich in seinem vnd seins gotzhaus dienst, an Pfaerden vnd an andern sachen genomen han, wie daz alles genant oder gehaizzen waer, vncz auf heutigen tag, also daz ich, mein Erben noch ander yemant von meinen wegen, hincz dem Obgenanten Herren von Salzburch seinem Gotshaus vnd nach chömen nichts mer ze sprechen haben schullen noch mügen wenig noch vil an alles geuaer, Vnd darv^eber ze vrchünd gib ich den Offen brief versigelten mit meinem aigen anhangundem Insigel, dar vnder ich mich vnd mein Erben verpinden staet ze haben allez daz, dez an dem brief verscriben ist. Der geben ist ze Salzburch, Nach Christes gepürd Dreuczehen Hvndert Jar darnach in dem Sechs vnd Sibenczigistem Jare, an sand Chünigunden tag.

Source Fulltext: OÖUB 9 (Wien 1906), S. 29-30