JIch frydreich vom Dorf, ich Dorothe sein Hausfrow vnd alle vnser Erben ver iehen mit dem offen brief vnd tu^on chund alle den dy in sehent oder hörent lesen lebentigen vnd chünftigen, daz wir recht vnd redlichen ze chauffen haben geben, dem edlen vnserm genedigen Herrn Hern Eberharten von Chajpeln Haubtman ze Enns vnd seinen Erben vnser Hueb gelegen zu dem Dorf in perchkchircher pharr mit alle den Eren, rechten vnd nüczen, vnd dar zu gehört oder da von bechömmen mag versuecht vnd vnversuecht, vnd wye ein yeglich dinch genannt ist oder wo daz gelegen ist, vmb einen gelt, des wir von in gancz vnd gar gericht, vnd gewert sein ze rechten tegen an all unser scha^eden, Ich Obgenanter frydreich vom Dorf, vnd mein Erben, oder wer dy Hueb inne hat, sullen Hold darauf sein, vnd sullen dem Obgenanten vnserm Herrn Hern Eberharten von Chajpellen, vnd seinen Erben alle iar jericleichen, da von raichen, vnd dyenen an Sand Michelstag ain Phunt wyenner phening, Ich Obgenanter frydreich vom Dorff, vnd alle mein Erben haben auch auf der egenanten Hueb, chain ander recht nicht mer, nu^or daz Chaufrecht vnd da mit hat vnser Obgenanter Herr Her Eberhart von Chajpellen vnd sein Erben alle dy recht mit der egenanten Hueb ze wandeln, alz mit andern seinen Gütern, dy man ze chaufrecht von im hat, vnd wann sich daz obgenant chaufrecht mit dem chauf verwandelt, der da auffert der geyt ze anlayt Sechs wyenner phening, vnd wer da abfert der geyt ze abfa^ert Sechs wyenner phening, vnd des zu einer sichtigen waren vrchund gyb ich Obgenanter frydreich vom Dorff, fu^er mich vnd für mein Hausfraw Dorothen, vnd für alle vnser Erben dem Obgenanten vnserm Herren Hern Eberharten von Chappellen, vnd seinen Erben den Offen prief versigelten mit meinem Anhangunden Insigl wol bestett, vnd des zu^o einer pezzern sicherhait vnd gezewgnüzz mit meins Swager frydreichs des Lempleins vnd Hainreichs der Hachelspechken mit ir payder anhangunden Insygln, dy da mit gezewg sint durch vnser vleizzigen pett willen, in und iren Erben an schaden, Geben da man zalt von Christi gepurde über drew czehen Hundert jar vnd darnach in dem Sechs vnd Sybenczkisten jar des nachsten vreytagz vor dem Vaschang tag.

Source Fulltext: OÖUB 9 (Wien 1906), S. 28-29