Wir Albrecht von gotes gnaden, Herczog ze Ö/esterreich, ze Steyr, ze Kernden, vnd ze Krayn, Graf ze Tyrol zc: Bechennen vnd tu^on chvnt, Daz für vns, vnd vnser Herren, chömen vnser getrewr lieber Jo^erg von Liechtenstain von Nicolspurg, vnser Chamermaister, an stat der erba^eren Dorothen, weilent Hansen von Pu^ocheim tochter seiner elichen Hausfrowen, mit vollem gewalt, an aim tail, vnd vnser getrewr lieber Vlreich von Dachsperg anstat weilent Wolfgers von Dachsperg, seins bru^oder kindt ouch mit vollem gewalt an dem andern tail, von der zu^o spruche wegen, die si gen einander hetten, von Heyratgüter wegen, vnd bechanten da vor vns, swaz vnser Herren dar vmb erfvnden, vnd sprechen zu dem rechten, daz si ze peder seitt dabey beleiben wolten. Nu habent die selben vnser Herren erfunden, vnd gesprochen, Swaz des geltes sey, das widerlegt sey, das sulle vnd muge die vorgenant frow Dorothe ir lebtege vnuerchumbert inn haben, Aber nach irem tod, so sulle ez, geuallen, auf des vorgenanten Wolfgers von Dachsperg Chinder. Dann die Tausent phunt, die sey angestorben von weilent dem Stuchsen irem Enen, vnd swaz ouch dez dinstes ist, der mit rechter raittung von denselben Tausent phunden geuallen ist, von sand Jörgentag vncz auf die zeit, daz die frow vogtper worden ist, alz der brief, der dar über gegeben ist, damit sol vnd mag si allen iren frvmen schaffen, vnd geben, wem si wil. Mit vrchund dicz briefs, Geben ze Wienn an Eritag vor dem Sonntag Oculj in der Vasten. Nach Kristes gepurd Dreuczehen Hvndert iar, Darnach in dem Sechs vnd Sibenczigisten Jare.

Source Fulltext: OÖUB 9 (Wien 1906), S. 31