Ich fridreich der Swarczz von aygelczperig vnd mein hawsfraw vnd all vnser eriben, di wier haben oder noch chunftichleich gewinen, wier vergechen vnd tuen chunt offenbar an dem brif allen den, di den brief sehent oder hörent lesen, daz wier mit wolbedachtem muet vnd mit guetem willen vnd wart vnd mit Rat vnd mit gu^enft vnserr nachsten frewnt ze der zeyt, vnd wier Es wol getuen machten, Recht vnd auch Redleich ze chauffen haben gegeben dem Edlen herrn hern Ruegern von Starichenberch von wilperch vnd allen sein eriben, die er hat oder noch chunftichleich gewingt, vnseren hoff dacz Tenkkendarf, der gelegn ist in Greymharczsteter pharre, mit allen den eren, Rechten vnd nuczzen, vnd darzue gehort ze holczz vnd ze veld, ze wazzer vnd ze wissmad, versuecht vnd vnuersuecht, wie daz genant ist, auz vnser nuczz vnd gewer in ier nuczz vnd gewer vmb einen gelt, dez ich obgenanter fridreich der Swarczz von aygelzperig vnd mein hawsfraw vnd all vnser eriben ganczz vnd gar gericht vnd gewert sein von dem obgenanten Edlen hern hern Ru^egern von Starichenberch von wilperch vnd von allen seinen eriben ze Rechten Tegen an all vnseren schaden. ich hab auch ich obgenanter fridreich der Swarczz von aygelzperig vnd mein hawsfraw vnd all vnser eriben den obgenanten hoff ze lechen gehabt von dem obgenanten edlen hern heren Rugern von Starichenberch von wilperch vnd von allen seinen eriben vnd wier haben iem auch den obgenanten hoff vnd dew obgenanten Lehenschaft aufgegeben iem vnd allen seinen eriben vnd haben vns der verzigen, daz wier fu^erbaz chayn ansprach darnach nymmermer gehaben noch gewinnen schullen weder mit Recht noch an Recht allso, daz si den obgenanten hoff fu^erbazz verseczzen oder verchawffen oder fu^erbazz Leychen, wem sew verlu^est oder wem sew wellent an all ierrung. wier seyn auch dez obgenanten hoffs daz Tenkkendarff gelegen in Greymharczsteter pharre ier Rechter gewer vnd ier fu^erstant fu^er all ansprach, wo in dez not oder duerft geschiecht nach dez Lantes Recht ob der Ens. wer aber, daz in an der gewerschaft icht abgieng mit Recht, waz si dez schaden nemen, den ir ains pey seinen trewn gesprechen mag an ayd vnd vngeswaren vnd an alles Recht, denselben schaden allen schullen si haben auf vns vnd denselben schaden schull wier in auf Richten vnd widercheren an allen auszug vnd an all ieren schaden vnd daz schullen si haben auf vns vnd auf vnsern trewn vnd darzue all vnserr hab, di wier haben inner Lanczz oder aufer Lanczz, auf wazzer oder auf Lant, in steten oder in merchten oder in darffern, es sey anlikunczz oder farenczz guet, Es sein [sic] versu^echt oder vnuersuecht, Dez schullen si sich alles vnderwinden mit vnserem guetlichem willen vnd wart vnd daz schullen sew verseczzen vnd verchauffen vnd davon wechomen hawbtgueczz vnd schadens an chlag vnd an allez Recht, vnczzt daz si iers obgenanten hawbtgueczz vnd schadens ganezz vnd gar gericht vnd gewert werden an all ieren schaden vnd wer daselb herr oder Richter ist, der schol in daz schierm zu ierem frum vnd schull wier dez nicht wider seyn weder mit Recht noch mit [sic] an Recht noch mit Red noch mit Red noch mit werich vnd wer in dez hilfleich ist, der scholl von vns chain veytschaft [sic] darvmb nicht haben noch gewinen. Daz dem obgenanten edlen herren herrn Ru^egern von Starichenberch von wilperch vnd allen seinen eriben di Red vnd Landelung [sic] von vns Stet vnd vnuerchert beleyb, darvber gib ich obgenanter fridreich der Swarczz von aygelzperig vnd mein hawsfraw vnd all vnser eriben all vnuerschaydenleich miteinander in den offen brif versigelt mit meim anhangunden insigel vnd zu einer pessern sicherhayt vnd zeugnuzz mit vnserr Lieben frewnt, dew hernach geschriben stent, dez ersten mit chu^enracz von welfenberch anhangunden insigel vnd mit hannsen dez premsser anhangunden insigel vnd mit wolfganen [sic] ab dem slain anhangunden insigel vnd mit hainreichz dez aphelzzpechen anhangunden insigel, di ierew jnsigel an den brif gehangen habent durich vnser vleyzzigen pett willen, di der sach vnd der hanndelung damit zeug sind in vnd all ieren eriben an schaden. Der brief ist geben, do man zalt nach christi gepurd drewzehenhundert jar, darnach in dem sechs vnd sibenezkisten jar an sand grigorigen tag in der vasten.

Source Fulltext: OÖUB 9 (Wien 1906), S. 35-37