Jch Dorothe, Hern Reymprechts seligen von Waltse Tochter vnd hern Wu^olfings hausvrow von Stubenberch vergich fu^er mich vnd fu^er alle mein Erben vnd tu^en chunt offenleich mit dem brief allen den die in lesent oder ho^erent lesen, die nw lebent vnd hernach chu^enftig sint, daz ich mit gu^etem willen mit wolbedachtem mu^et vnbedwungenleich mit gunst vnd willen des vorgenanten meins wirts vnd ouch nach seinem vnd ander meiner frewnt rat ze der Zeit do ich es ze recht wol getu^on mocht mich verczigen vnd fu^erczicht getan han vnd vertzeich ouch mich recht vnd redleich mit dem brief gegen meinen lieben pru^odern Hern Rudolfen, Reymprechten vnd fridreichen von Waltse vnd gegen allen im Leiberben das Su^en sint alles meins Erbtails, den ich haben solt vnd mo^echt an allen den Gu^et vater vnd mein mu^oter seligen hinder in gelazzen habent lewt vnd guet, vesst, märkchten, dörffer.... vnd Erben nichts ausgenomen, also daz ich noch mein Erben furbaz chain ansprach noch vodrung von Erbtails wegen haben noch gewinnen sullen, weder vmb viel noch vmb wenig, es wär denn ob das geschech, des Got nicht welle, daz die vorgenanten mein Pru^eder Rudolf vnd Reymprecht vnd fridreich all drey abgiengen mit dem tod vnd chainen Sun hinder Jn liezzen oder ob Si Su^en liezzen vnd daz die auch abgiengen vnd an Sun verfu^ern, So sullen denne ich obgenantew Dorothe vnd mein Erben an allen den gu^etern, die Si vnuerchumert hinder Jn lazznt, alles das erben vnd haben daz wir ze recht daran erben vnd haben sullen alz ander To^echter nach des Lanndes recht ze O^esterreich. Vnd dar uber so gib ich Jn den brief fu^er mich vnd mein Erben zu einem warn vrchund der sach versigelten mit meinem aygen angehangen insigel vnd mit des vorgenanten meins lieben wtrts insigel Hern Wu^elfings von Stubenberch vnd mit meins lieben vettern insigil Hern Hainreichs von Waltse zu den zeiten Houbtman ob der Ens vnd mit meins O^eheims insigel Hern Hainreichs von Potendorf Hern Ru^odolfs sa^eligen Sun, die ich des vleizzichleich gepeten han, daz si der fu^ortzicht vnd sach getzeugen sint mit irn angehangen insigeln vnd verpind ouch ich mich egenantew dorothe mit sambt meinen Erben vnder meinem vnd der vorgenanten meins Wirts, meins Vettern vnd meins Öheims insigeln die obgenant fu^ertzicht gentzleich stet ze haben in dem rechten alz vor an dem brief geschriben stet, der geben ist nach Christes gepurt drew czehen hundert jar, dar nach in dem Sechs vnd Sibentzgistem Jar des nechsten phincztags vor mitervasten.

Source Fulltext: OÖUB 9 (Wien 1906), S. 40-42