Ich Dorothe, Hern Hannsen seligen von Puchheim Tochter vnd Jo^ergen Hausvrow von Liechtenstain von Nicolspürch des Hochgeporn fu^ersten meins gnedigen Herren Herczog Albrechts ze O^esterreich Kamermaister, Vergich vnd tu^on kunt allen den die den brief lesent oder ho^erent lesen, di nv lebent vnd hernach chu^enftig sint, Daz ich mit meiner erben gu^etem willen vnd gunst mit wolbedachtem mu^et vnbedwungenleich vnd nach Rat meiner nechsten frewnde zu der zeit, do ich es wol getu^en mocht, gemacht vnd gegeben han, mache vnd gib auch Recht vnd redleich mit dem brief dem vorgenanten Jo^ergen von Liechtenstain meinem wirt, durch lieb vnd trewn willen vnd vnser paider chinden, die wir mit einander gewinnen in dem rechten, alz hernach an dem brief geschriben stet, meins Ledigen Gu^etes, die Tawsent phunt wienner phenning, die mich von meinem Enen mu^oterhalben hern Hadmarn dem Stu^ochsen von Trawtmanstorf seligen anerstorben vnd angeuallen sint fu^er meinen Erbtail vnd die mir auch vor dem egenanten meinem Herren dem Herczogen von den Lanntherren ledichleich gesprochen vnd ertailt sint, Als der brief Sagt, der mir dar über gegeben ist, vnd der ich geweiset pin auf di Vestt ze Pilichdorf vnd swas darczue geho^eret, als die brief sagent, die ich darumb han, Vnd darzue die Sechshundert phunt wienner phenning die ze dienst darauf gegangen sint, als ich daz auch vor dem egenanten meinem Herren dem Herczogen vnd vor den Herren bestett han, als ich ze recht solt vnd alz die brief sagent, die mir daru^eber gegeben sint, vnd derselben Sechshundert phunt mich meins vordem wirts Hern Wolfgers seligen von Dachsperch Erben richten sullen, Also mit der beschaidenhait, ist, daz ich mit dem egenanten meinem wirt Jo^ergen von Liechstain (sic!) chind gewinne, darauf sullen nach vnser paider tod, die vorgenanten Sechczehen Hundert phunt, auf den Gu/atern daran Si denne ligent, Erben vnd geuallen an allen chrieg. Wer aber, daz ich egenantew Dorothe abgieng mit dem tod, ee denne derselb Jo^erg von Liechtenstain mein wirt, vnd daz wir mit einander nicht chind gewunnen, dez Got nicht welle, oder ob wir chind mit einander gewunnen vnd das die auch abgiengen, ee denne der selb mein wirt, So sol er denne die vorgenanten Sechczehen Hundert phunt auf den Gu/atern, daran Si denne ligent, Ledichleich haben, vnd mag auch die denne geben, machen, oder Schaffen, wem er wil, vnd alles daz damit tu^en daz Im aller pest fu^egt, oder geuellet, an alle irrung, Gieng aber, derselb Jo^erig von Liechtenstain mein wirt, ab mit dem tod, ee denne ich vnd daz er mir nicht chinde hinder Jm liezze, die wir mit einander hieten, oder, ob er mir chind liezze, die wir mit einander hieten, vnd das die auch abgiengen ee denne ich, So sol ich denne die obgenanten Sechtzehen Hundert phunt auf den Gu^etern, darauf die selben phenning denne ligent, auch ledichleich haben, vnd mag auch die geben machen vnd schaffen, wem ich well, vnd alles daz damit tu^en daz mir aller pest fu/agt oder geuellet an allen irrsal, Wer aber, daz man den egenanten Satz ze Pilichdorf löst, So sullen denne die selben Tausent phunt, mir vnd dem egenanten Jo^erigen von Liechtenstain meinem wirt, vnd vnser paiden chind, die wir mit einander gewinnen wider angelegt werden nach vnser paider frewnt Rat ze erben vnd ze geuallen in allen dem rechten, so vor an dem brief geschriben stet, Vnd daz dem oftgenanten meinem wirt Jo^ergen von Liechtenstain vnd vnser paiden chinden, die wir mit einander gewinnen, daz gemecht vnd geben, fürbas stet, vnd vnczebrochen beleib, in dem rechten, so vorgeschriben stet, Daru^eber so gib ich obgenante Dorothe Jn den brief zu einem warn vrkund der Sache versigelten, mit meinem aigenn angehangen insigil, vnd mit der erbern Herren insigiln meins vettern Hern Albers von Püchhaim obristes Druchseczen in O^esterreich, Hern Wernharts von Meissaw obrister Marschalich vnd zu den Zeiten Lantmarschalich in O^esterreich, Hern Chu^enrats von Potendorf meins O^ehems vnd Hern Chadolts von Ekchartzaw des Eltern, vnd mit meiner O^ehemen insigiln Hern Hainreichs von Neytperch, Hern Wu^elfings von Stu^ebenberch vnd Jorgen von Chranichperkch von Mu^erekk, die ich dez vleizzichleich gepeten han, daz Si der sache gezeugen sint mit irn/e angehangen insigiln, Vnd verpinde auch mich vnder meinem vnd derselben Herren vnd meiner frewnde insigiln allez daz stet ze haben, das vor an dem brief geschriben stet, Der geben ist ze Wienne nach christes gepürde Drewczehen hundert iar, darnach in dem Sechs vnd Sibenczgistem Jare des Sunntags ze Mitteruasten.

Source Fulltext: OÖUB 9 (Wien 1906), S. 42-44