Ich Hans am Lehen, ich jacob, ich vlreich vnd ich Hainreich, ich Wolfhart, all geprueder, ich Chünigunt vnd ich Elspeth ir swester vergechen für vns vnd all vnser erben vnd tu^on kunt offenlich mit dem brief allen den, die in sehent, lesent oder ho^erent lesen lebentigen vnd chu^onftigen, Daz wir mit wolbedachtem müt vnd mit gu^otem willen ze der zeit, do wir es rechtlich wol getu^on mochten, Das lehen am winnthag gelegen in altenb(ur)ger pharr vnd genant am lehen, vnd das vnser vreis aigen gewesen ist, die aigenschaft aufgeben haben vnserm gnedigen Herren Hern Eberharten von kapellen houbtman ze Ens vnd sein erben, vnd Haben das egenant lehen, Herwider genomen ze rechte pu^orkrecht von den egenanten vnserm genedigen Herrn von kapellen, also daz wir alle jar jerklich da von dienen vnd geben sullen vnuerczogenlich an vnser frawntag ze dem Liechtmezz, wir oder wer das lehen nach vns besiczt zu der kapelln gen mitterberk auf vnser frawn altar zu dem Liecht ain phunt wachs, vnd sullen das antwortten dem purkgrafen ze mitterberk oder wer zechmaister der kapellen ze Mitterberk ist, vnd sol auch der egenant vnser Herr von kapellen vnd sein erben oder wer Herr ze mitterberk ist vnser vnd des obgenanten pu^erkrechts rechter Herr, vogt vnd Scherm sein als anderew purkrecht recht haben in dem Land ze O^esterreich vnd swann sich das guet verwanndelt, So geit der der do ab vert ain vi^erdinkch wachs, vnd der do ab (sic) fuert auch ein virdu^enkch wachs vnd nicht mer, auch zu^o der egenant chapellen gen mitterberkch als vorgeschriben stet vnd das das alles also stet vnd vnczerbrochen beleib dar über zu^o einer waren ürchund der sach geben wir obgenant prueder all fu^omf vnd paide ir Swester für vns vnd all vnser erben den brief versigelten mit Albrechts des O^eder ze der zeit landrichter im machlant vnd petreins des zelhofer Richter datz zell anhangunden insigeln in vnd iren erben an schaden, die wir vleizzig dorvmb gepeten haben, Wann wir aigen insigel nicht enhaben, So verpint wir vns obgenant alle vnuerschaidenleich vnder der obgenanten zwaier insigel mit vnsern trewen an aydes stat, alles das stet ze haben vnd ze volfu^eeren, daz an dem brief geschriben stet vnd der sach ist gezewg Hainreich der Hahelspekch mit seinem insigel durch vnser vleizzigen pet willen im ane schaden. Geben nach kristes gepurt Dreuczehen hundert jar vnd darnach in dem sechs vnd sibenczigistem Jare an vnser frawn abent ze der Liechtmezz.

Source Fulltext: OÖUB 9 (Wien 1906), S. 11-12