Ich Hainreich der Elreychinger, mein hausfraw vnd all vnser Erben wir veriehen offenbar mit dem brief allen la^ewten, Daz wir recht vnd redleich geworben haben mit dem Erbergen hern hern vireichen dem Go^erga^er di zeit pfarrer ze Obernperg di widern gehaizzen datz Senfftenpach vmb ein gelt, dez wir in gantz vnd gar gericht vnd gewert haben, Alzo mit der beschaiden, daz wir di obuerschriben wydem sein lebtag su^ellen inn haben vnd di niezzen mit allen den Ern, rechten vnd auch nu^etzzen, di dar zu^e geho^ernt ze holtz, ze veld vnd ze wysmad, ez sey besu^echt oder vnbesucht, vnd wan daz ist, daz der obenant her vlreich der Go^erga^er pfarrer ze Obernperg mit dem to^ed ab get, dez got lang vor sey, So sol di obuerschriben wydem datz Senfftenpach ledichleich vnd an allev wider red wider geuallen, wem di Chirch dann ze Obernperg gelyhen wirt oder auf sein verwesa^er vnd su^ellen ich noch mein hausfraw noch vnser Erben noch niempt von vnsern wegen auf di obenanten wydem nichtz mer ze sprechen haben in dhainer weis weder von zymmer noch von Pawes wegen. Ez sol auch der obenant herr her vlreich der Go^erga^er pfarrer ze Obernperg sein lebtag der obenanten widern vnser herr vnd gewer sein an aller stat, vnd vns dez not vnd durfft geschiecht, alzo des landes recht ist. war aber, ob wir icht Chriegs nach seinem to^ed mit dem, dem di pfarr dann verlihen wurd oder mit seinem verwesa^er wolten haben, vmb welherlay sach daz wa^er, mit recht oder an recht oder wi wir daz mit seinem nachomen oder mit seinem verwesa^er an hueben, daz sol dhain Chraft nicht haben vnd daz su^ellen si alz an aller stat behabt haben vnd wir gen in verlorn. Vnd daz daz dem, wer pfarrer nach hern vlreichen wirt oder seinem verwesa^er Daz alzo stat beleib, Gib ich in den brief mit meim aygen anhangundem insigel vnd ze einer pessern sicherait mit Chunrad dez Lawer insigel, der daz durch meiner fleizigen pet willen an den brief gehangen hat der sach zue einer zevgnu^ezz ym vnd sein Erben an allen schaden, Dar vnder ich mich vnd all mein Erben verpint mit vnsern trevn alz daz sta^et ze haben, daz oben geschriben stet. Der sach sind zevg vnd taydinger gewesen her Chunrat di weil vicarij ze weilpach, Hainreich der Lengawer vnd vlreich von Muerhaym vnd ander Erberger la^ewt genueg. daz geschach an dem lyechtmizz tag nach Christi gepu^erd Drevtzehen hundert jar, dar nach in dem Segs vnd Sybentzgistem jar.

Source Fulltext: OÖUB 9 (Wien 1906), S. 16-17