Ich Anna, Hern Ortolffs von Waldek, dem got gnad, witib, vnd ich Orttolff von Waldekk, ir sun, wi^er veriehen fur vns vnd vnser Erben offenbar mit dem brief allen la^ewten, Daz wir mit veraintem mu^et recht vnd redleich verseczt haben vnser Guet, daz gelegen ist dacz Obern Mu^erhaim, vnd da Hansel di weil auf gesezzen ist, dem beschaiden Meyngozzen von Holtz, seiner Hausfrawn vnd allen i^ern Erben, wie di genant sind, oder werdent, vmb zwelff pfunt wienner pfenning, di si vns berait vnd an rechten no^eten dar auf gelyhen habent. Wir haben in auch daz Obenant Guet geantwurt aus vnser nuczz vnd gewer in ir nuczz vnd gewer in Saczz weicz mit stifft vnd mit sto^er vnd mit allen den Ern, rechten vnd auch nu^eczzen, di dazu^e geho^ernt, ze holcz, ze veld, ze waid vnd ze wismad, ez sey besucht oder vnbesu^echt, alzo wir daz selber inn gehabt haben. Vnd sein auch dez Saczz ir gewer vnd fu^erstand, wo in dez not vnd durfft geschiecht, alzo dez Landes recht ist. Wa^er aber, ob wir oder vnser Erben oder yempt von vnsern wegen in Chrieg oder in va^ell wolten tu^en an dem obuerschriben Saczz, Daz wa^er mit Geistleichem oder weltleichem rechten, daz sol alz ab to^ed vnd ze nichtew sein, vnd wider den i^ern brief vnd i^er nuczz vnd gewer dhain chrafft nicht haben, vnd su^ellen si auch allew irew recht, wie di gena^ent sind, gen vns vnd aller vnser hab an aller stat erlangt vnd behabt haben vnd wir gen in verlorn, vnd welherley Chrieg oder mu^etwillen wir gen in dar vmb anhueben, da sol si di Herschafft, oder wer an irer stat ist zu^e scherm vnd in dez vor sein. Wir haben auch losung allev iar vor Lyechtmizz vi^erczehen tag oder hin nach vierczehen tag vmb di obuerschriben zwelff pfunt pfenning, di dann gib vnd ga^eb sind an allen abslach, vnd wann wir daz von in gelo^ezen, so sol in die Stifft inn beleiben, vnd sol dann der man, der di weil auf dem gu^et gesezzen ist, das selb iar mit ruen siczzen. Auch ist mer gesprochen, ob wir alz lang nicht lo^eza^eten, vncz daz ich obenanter Orttolff von Waldekk ain aygen Insigil gewunn, wer dann der ist, der daz von i^ern wegen an vns traett, dem su^ell wir den brief neven an schaden vnd an allev widerred. Vnd daz in oder wer den brief mit irem willen inn hat vnd vns da mit ermont, Daz alzo sta^et beleib, Gib ich Frow Anna von Waldekk in den brief mit mein aygen anhangundem Insigel, vnd ze einer pessern sicherhait mit Petern dez Tuemair insigel, der daz durch vnser fleizigen pet willen an den prief gehangen hat, jm vnd sein Erben an allen schaden, Dar vnder ich mich obenanter Ortolff von Waldekk vnd all mein Erben ze sampt meiner obenanten lieben Mu^eter verpinten alz daz sta^et ze haben, daz oben geschriben stet. Der sach sind zevg Ruger Pittrolff, Hainrich vnd Vlreich di paid Chern vnd ander Erber la^ewt genu^eg. Daz geschach an dem Lyechtmizztag nach Christi gepu^erd drevtzehen hundert iar dar nach in dem segs vnd sybenczgistem iar.

Source Fulltext: OÖUB 9 (Wien 1906), S. 14-16