Ich Ru^oger von Starchenberg der Elter vnd ich Ru^oger der Starhenberger sein veter der ju^enger, vergehen offenbar mit dem brief für vns vnd vnser erben vnd mit sampt allen vnsern helfären daz wir vmb die chrieg, stözz, mishellung, ansprach vnd all anfa^ell, so wir gehabt haben gegen Hern Hainrich dem Scho^ennawer vnd seinen su^enn vnd allen ihren helffärn gehabt haben vncz auf den hewttigen tag vnd der brief geben ist, ez sey vmb rav^ob, prant, venchnuss, todslag oder vmb welherlay sach vnd handl zwischen vns vnd in sich vergangen hat vntz auf den egenanten tag, wie ez allez genant ist vnd gehaizzen mag an allen auzzug, Gegangen sein vnd gen auch dez wizzentlich mit aigen willeichen vnd mit vnserm gutleichem willen vnd vmbetwongenleich hinder die Erbern Ritter vnd Chnecht Herrn Wernharten von Aistershaim, Herrn Andre den Hawnsperger, Herrn Vlreichen von Rorbach die czeit Lantrichter ob der Enns, Herrn Gundachker von Tannberch, hawnnolten den Ra^ewter vnd Ewerharten den Stadler, Also mit der beschaiden vnd mit worten den selben obgenantten sechsen geben haben vnd auch geben vollen vnd ganczen gewalt, waz sew von iren trewn sprechend zwischen vns vnd allen vnsern helfären vnd den Egenantten Schönnawern vnd allen iren Helffa^eren ze tun ze sazzen auf oder ab, daz wellen vnd su^ellen wir gancz vnd gar stat haben vnd dabey beleiben an allez geuerd. Gyengen wir aber dez Spruchs indert auz vnd den nicht volfürten, als an dem brief geschriben ist, so seyen wir veruallen den obgenanten Schönnawern aller der Zuspruch, die si hintz vns sprechend vnd vordrent sint, darczu^o sey wir auch veruallen dem Hauptmann ob der Enns der ez dann zder selben stv^ond ist vnd den egeschriben vnsern spruchlawten sechs hundert phunt wienner phenning vnd mögen vns auch denn vmb die selben phening wol no^eten vnd phenden vnd aller vnser Hab sich vnder winden mit gu^etleichem vnserm willen, als vil vnd verr vntz si der vor uerschriben phenning davon becho^emen vnd gericht werdent. Ez ist auch zu^o merchen vnd mit worten auz genomen, ob wir der egemelten Spruchman ainen oder menigen nicht gehaben mochten, wie sich daz vergieng, so sullen vnd mögen wir einen andern piderman nemen in allen den rechten vnd pu^enden als emallns geschriben stet, Daz die voruerschriben gelüb vnd hindergang von vns sta^et vnd vnueruchkt beleiben, daz loben wir in mit vnsern trewen an aydez statt vnd geben dez ze scheinbaren vrchund den offen brief gesigelten mit vnser egenanten bayder von Starhenberch anhangunden Insigeln vnd mit vnsers lieben öhaim Herrn Hainrich von Walsse die czeit Hauptman ob der Enns anhangunden insigel, der damit czewg ist der voruerschriben sachen durch vnser vleizzigen ped willen im vnd seinen Erben an allen scha^eden, geben an phincztag nach vnser vrawntag zder Lichtmezz nach Christ gebürt drewczehen Hundert jar darnach in dem sechs vnd Sibenczigisten jar.

Source Fulltext: OÖUB 9 (Wien 1906), S. 21-23