Ich Jacob der Ledrer mein wirtin vnd vnser Erben veriehen mit disem offen prief vnd tun chunt das wir vnsern halben weingarten den Reifler in Dobrenersdorffer perch gelegen recht vnd redleich verchaufft haben philipen dem Ledrer seiner wirtin vnd iren erben vmb an ain Dreissikch phenning vierdhalb march greczer phenning der wir gancz vnd gar gewert sein. Wir haben in auch den obgenanten Halben weingarten aufgeben mit des Erbern Herren Hern Chunrat von Apfolter perchmaister die zeit, wir loben in auch mit vnsern trewn den obgenanten weingarten ze schermen jar vnd tag. Tet wir des nicht, welhen schaden sew des nement, den schullen wir in ablegen an chlag vnd an alles tayding. das habent sew auf all dew vnd wir haben, versigelt mit des Obgenanten Perchmaister Insigel den er durich vnser pet willen daran gehangen hat im vnd allen seinen erben an schaden. Geben nach Christes geburd Dreuczehen Hundert jar darnach in dem Sechs vnd sibenczigisten Jar. an sand Scolasticatag.

Source Fulltext: OÖUB 9 (Wien 1906), S. 24