Ich Ru^odolf von Waise Haubtman in Steir enbiet Hansen dem Stainhülwer oder swer mein Mau^eter ze Newnburg ist mein gru^ozz, vmb di gnad so mein Vetter Her Eberhart selig von Waise, dem got gnad den erwirdigen Herren dem Probst von Pav^enburg vnd seinem Gotzhaus tan han mit seinem prief von der Freigung (!) wegen, die sy ze Newnburg an der mau^et habent, wil ich vnd enphilch ew. swaz der selb meins vettern Hern Eberhartz seligen von Waise prief sag, daz ir daz stet habet an geverd, also daz ir in iecz vnd fu^erbaz ewichlich dhain irru^eng dar an icht tu^et, mit vrchund dez priefz den ich in dar vber gib versigelten mit meinem anhangendem Jnsigel, der Geben ist ze Sewsnekk do man zalt von Christes gepu^ert drewzehen Hu^ondert Jar dar nach in dem Sechs vnd Sybenczigistem Jar dez Eritagz vor dem Hailigen Plu^emoster tag.

Source Fulltext: OÖUB 9 (Wien 1906), S. 62