Ich Rüedel von Rüenting in Scherdinger gericht, mein hausfraw vnd all vnser erben, veriehen, vnd tu^on chunt offenbar an dem brief allen Läwten, daz wir von vnserm lieben Herren Hern Wernharten dem Granns von Vttendorff, von seiner hausfrawn vnd von allen irn erben recht vnd redleich gechaufft haben ze rechtem Erbrecht den Obern hof ze Ru^eenting mit allen ern, rechten vnd nützzen, di dar zü geho^ernt besu^echt, vnd vnbesücht, alz si denselben gehandelt vnd genozzen habent, also mit der beschaiden, daz wir in von dem vorgenanten hof alle iar iärleich ze dienst raihen vnd geben su^ellen ze rechter dienst zeit zu^e sand Giligen tag auf im Chasten zway schaf du^errs chorns scherdinger mazz vnd zway swein für ein pfunt wienner pfenning, vi^er diensthu^enrr vnd ze Stift zway pfunt wienner vnd zway hünrr vnd für di weised zwelf chäs vnd drey schillinger ayer vnd für di werichhart süllen wir in alle iar anderhalbs vas weins von Pazzaw gein Vttendorf fu^ern vnd also su^ellen wir in den obgenanten dienst vnd voderung alz oben an dem brief verschriben ist, järleich geben ze rechter zeit, vnd swenn wir daz versäzzen, so habent si vollen gewalt vns dar vmb ze pfenden, alz ander ir behaust Holden vnd swenn wir sew irs vorgenanten dienstz vnd voderung verrichten, alz oben an dem brief ist verschriben, so habent si daz selb iar nichtz mer hintz vns ze vodern noch ze sprechen, vnd ob ein gemainer lantzprest auz cha^em, waz si vns dann pezzerung tünt, daz stet datz irn trewn vnd süllen in nicht verrer dar vmb zü sprechen. Si süllen vns auch versprechen, alz ander ir behaust Holden, an gever, vnd dar über ze einem vrchu^end, Geben wir in den brief mit dez erbern mannes Hern Chunratz des Raspen ze den zeiten purger ze Scherding anhangunden Jnsigel versigelten, der daz ze einer gezewgnüzz an den brief gelegt hat, durich vnserr vleizzigen gepet willen, im, vnd allen seinen erben an schaden, dar vnder wir vns verpinden mit vnsern trewn, an aydez stat, allez daz staet ze haben. Daz der brief sagt, der Geben ist, do man zalt, von Christi gepürtt, drewtzehen Hundert iar vnd darnach in dem Sechs vnd Sibentzkisten iar an sand bartholomeustag dez heiligen zwelfpoten.

Source Fulltext: OÖUB 9 (Wien 1906), S. 135-136