Wir Lamprecht von gots gnaden Bischof ze Babemberg. Bekennen vnd tu^on chunt offenlich mit disem brief, Vmb die puntnuzz, die zwischen den Hochgeborn fürsten Herczog Albrecht vnd Herczog Leujpolt Gebru^edern Herczogen ze Österreich, ze Steyr, ze Kernden vnd ze Krain, Grafen ze Tyrol zc vnsern lieben Herren, vnd dem Erwirdigen Hern Ludweigen, Bischofen ze Babemberg vnserm voruarn gemachet, vnd verbriefet ward, Daz wir dieselben puntnuzz, freuntschaft vnd verainung, mit den egenanten vnsern Herren von Österreich aufgenomen haben vnd furbazzer halten wellen von dem tag als der brief geben ist, sechs gancze iar, die schirest nach einander chunftig sind ane geuerd, mit allen den punten vnd artiklen, die in dem egenanten vnserr Herren von Österreich briefe, begriffen, vnd verschriben sind, vnd derselb brief volliklich beweiset, an alles geuerd vnd argenlist. Vnd dar uber zu^o vrchund vnd sicherhait hiezzen wir disen brief, mit vnserm anhangendem Jnsigel besiglen. Der geben ist ze Wienn an Eritag nach sand Jacobstag. Nach krists gepurd Dreuczehen Hundert iar, darnach in dem sechs vnd Sibenczigistem Jare.

Source Fulltext: OÖUB 9 (Wien 1906), S. 124