Ich Rudolf von Waltse ze den Zeiten Houbtman in Steyr, ich Reymprecht, vnd ich fridreich von Waltse des egenanten hern Rudolfs Bru^eder, ich Wolfgankch vonn Wynnden, ich Alber von Ottenstain der alt, ich O^etakcher der Wolfstain, ich Michel der Vtendorffer, ich hanns Chu^etzkchofen, ich Hanns der Hager vnd ich Hanns von Hochenekk vnd alle vnser Erben, Wir veriehen vnd tu^en chunt allen den die den brief lesent oder horent lesen, Daz wir vnuerschaidenleich gelten su^ellen Chadolten von Wehing vnd seinen Erben oder wer den brief mit irem gütem willen innehat, achthundert phunt wienner phenning, die er vns berait gelichen hat vnd die wir obgenanten drey Prüder von Waltse entnomen haben vnserm vettern Jo^erigen von Waltse von Lyntz zu seiner rechten no^et du^erft an den Tawsent phunden wienner phenning die er vnserm O^ehem Seytzen von Chu^enrring an der Lo^esung ze Alachtsteyg schuldig gewesen ist, Also mit ausgenomenen worten, ist, daz wir den vorgenanten Chadolten von Weching vnd sein Erben, oder wer den brief mit irem gu^etem willen innehat, der egenanten Achthundert phu^ont phenning richten vnd weren von Sant Larenczen tag der schierist chu^omt v^eber ain jar, So sein wir slechtleich von Jn ledig. Wer aber daz wir Si derselben phenning auf denselben tag nicht werten, alle die weil wir Si denne fu^erbaz derselben phenning nicht richten vnd weren vnd daz wir die inne haben wollen vnd daz ouch Si vns der gu^ennen vnd peyten wellent, So su^ellen wir obgenanten all vnd vnser Erben vnuerschaidenleich In dauon dienen alle jar Achczig phunt wienner phenning ze den zwain tegen an Sand Michels tag vnd an Sant Jo^erigen tag ze yedem tag viertzig phunt vnuerczogenleich vnd an allen abslag, vnd sullen denne mit dem ersten dienst anheben von Sant Michels tag der schierist chumt v^eber ain iar, vnd haben ouch wir obgenanten drey Bru^eder von Waltse, an des vorgenannten Jo^erigen vnsers Vettern stat dem vorgenanten Chadolten von Woehing vnd seinen Erben oder wer den brief mit irm gu^eten willen innehat, den vorgenannten dienst ausgeczaigt vnd geschafft, vnd schaffen In den mit dem brief ouf desselben vnsers vettern Gu^eter, die hernach benant sind. Von erst ze Schönngrabarn zwai vnd dreizzig phunt phenning geltes, die man ierleich dient an Sant larenczen tag vnd daselbens zwelif phunt geltes, die man ierleich dient an dem Prehemtag fu^er weysat vnd ouf alle die nv^etz vnd gu^elt, die der egenant vnser vetter hat daselbens ze Schönngrabarn, Es sey von stewer oder von Holcz oder wie das genannt ist, Darnach ze Stelczerndorf fv^emf phunt vnd Sechczig phenning geltes an Sant Michels tag vierczehen Schilling vnd an Sant Jo^erigen tag vierdhalb phunt vnd swas der egenant vnser vetter daselbens ze Stelczerndorf hat, Es sei Pantayding oder wie das genant ist, Darnach ze Ymendorf drey czehen Schilling vnd vier vnd zwainczig phennig geltes an Sant Michels tag. Darnach ze Chelichdorf zwelif Schilling gelts an Sant Jo^erigen tag, Darnach ze Weykestorf Syben Schilling vnd zwelif phenning gelts halb an Sant Michels tag vnd halb an Sant Jo^ergen tag, Darnach ze heczmannstorf ein halb phunt vnd drey phenning gelts an Sant Jo^erigen tag, Darnach ze Geytzendorf zwelif phunt Syben Schilling vnd acht phenning gelts an Sant Michelstag, vnd swas der egenannt vnser vetter daselbens hat, Es sey Stewer oder wie das genant ist. Darnach ze Harras zwai phunt drey Schilling vnd Syben phenning geltes an Sant Jorigen tag, Darnach ze Grunt von einem viertail Lehens ein halb phunt gelts an Sant Michelstag, Darnach ze Stronsdorf ouf Hofsteten fv^emf phunt vnd zwen vnd sybenczig phenning gelts an Sant Michels tag vnd an Sant Jo^erigen tag, vnd auf der Padstuben daselbens Sechs Schilling gelts vnd ouf v^eberlent daselbens drew phunt Sechs Schilling vnd achthalben phenning gelts an Sand Michels tag. Darnach ze Gejpendorf auf v^eberlent drey Schilling gelts an Sand Michelstag, mit solcher beschaidenhait daz di Amptlew/at, die der egenanten Gu^eter Amptlewt sind oder werdent, dem vorgenannten Chadolten von Wehing vnd seinen Erben, oder wer den brief mit irm gu^etem willen inne hat, den egenanten im dienst von denselben Gu^etern alle iar raichen su^ellen zu den obgenanten tegen an alle ir mu^ee vnd swas denne der v^ebrigen nu^etz vnd gu^elt ist, von den egenanten Gu^etern, alle iar v^eber dieselben achczig phunt, das sol dem vorgenanten Jo^erigen von Waltse vnd seinen Erben geuallen. Wer aber, daz dem vorgenanten Chadolten von Wehing vnd seinen Erben, oder wer den brief mit irm gu^eten Willen inne hat, des selben irs Dienstes an den egenanten Gu^etern icht abgieng, vnd daz Jn der alle iar genczleich nicht geviell vnd geraicht wu^erd zu den obgenannten tegen, von welherlay sachen Jn derselbe abgangkch gescha^ech, das su^ellen wir obgenanten alle vnd vnser Erben vnuerschaidenleich Jn denne eruollen vnd erstatten an an alle widerred, souerr daz Jn die egenanten achtzig pfunt diensts alle iar gancz vnd gar geuallen vnd gerichtet werden, an allen gepresten. Tet wir des nicht, welich drey Si denne vnder vns obgenanten allen, oder vnsere Erben monent vnd vodernt, der sol dhainer ouf den andern nicht waigern, Sonder ir igleicher sol denne einen Erbern chnecht selbandern mit zwain pherten des nechsten tags darnach ze Wienne in ein erber gasthaws senden, wo Si Jn hin zaigent vnd sullen die da inne ligen vnd laisten, alz inneligens vnd laistens recht ist, vnd da nymmer auschomen, Si werden ee irs dienstes des wir Si denne ze richten schuldig sein, alz vorgeschriben stet, gancz vnd gar gewert. Wir haben ouch vollen gewalt, das vorgenannt gelt von Jn abczelo^esen, wenne wir das von Sant Larenczen tag, der schierist chu^omt, v^eber ain iar dar nach getu^en mu^egen, oder wellen, also wenne das ist, nach demselben iar, daz wir Jn geben Achthundert phunt wienner phenning mit einander vnd des diensts als uil, damit alz von der zeit gepu^eret, die Sich denne an dem iar vergangen hat, vnd daz wir Jn ouch dasselb gelt alles geantwu^ertten an allen iren schaden, wo Si das in dem lannde ze O^esterreich nemen wellent, So sein wir desselben geltes allerding von Jm ledig vnd los vnd sullen ouch wir Jn dieselben Lösung, wenne wir die tu^en wellen zway moneyd vor ze wizzen tu^on angeuer, oder wenne das ist, nach dem egenanten iar, daz Si die vorgenanten achthundert phunt haben wellent, das su^ellen Si vns ouch zwai moneyd vor ze wizzen tu^en vnd su^ellen wir Si denne in denselben zwain moneyden derselben phenning vnd als uil diensts damit alz von der zeit gepu^eret, die sich an dem iar vergangen hat, vnuerczogenleich richten vnd weren vnd su^ellen Jn dasselbe gelt aber geantwu^ertten an allen irn schaden, wo Si das in dem Lannde ze O^esterreich nemen wellent. Teten wir des nicht, welich Si denne vnder vns obgenannten zehenn, oder welcher vnder vns mit dem tod abgegangen wer, Darnach deselben nechsten Erben monent vnd vodernt, der sol aber dhainer auf den andern nicht waigern, Svnder vnser igleicher der von Jn gemont wirt, sol denne Einen Erbern chnecht selbandern mit zwain pherten des nechsten tags darnach ze Wienne in ein erber gasthaus senden, wo Si Jn hin zaigent vnd sullen di da inneliegen vnd laisten alz inneligens vnd laistens recht ist, vnd da nymmer aus chomen, Es werd ee der vorgenannt Chadolt von Wehing vnd sein Erben, oder wer den brief mit irm gu^etem willen innehat, der egenanten acht hundert phunt vnd des dientes der dauon gepu^eret alz vorbeschaiden ist, ganz vnd gar gewert vnd daz Jn ouch daselbe gelt geantwu^ertt werde, an ein stat, wo Si das in dem Lannde ze O^esterreich nemen wellent, alz vorbegriffen ist. Wer aber, daz wir Jn die laistung verczugen vnd nicht laistieten in der weise so vor geschrieben stet, Es wer vmb dienst oder vmb Houbtgu^et, oder ob wir Jn so lang laistieten, daz si des verdru^ezz, Swaz Si denne irs geltes diensts oder houbtgu^ets, des wir Si ze richten schuldig sein, fu^erbaz schaden nement, datz Christen vnd datz Juden, in welhen wegen das ist, oder wie der schad genant ist, daz ainer der den brief zaigt bei seinen trewn vngesworn gesprechen mag, denselben schaden mitsambt dem dienst vnd houbtgu^et su^ellen Si haben ouf vns obgenannten zehenn vnd allen vnsern Erben vnuerschaidenleich vnd ouf allem vnserm Gu^et, das wir haben in den Lannden ze O^esterreich vnd ze Steyr, oder wie (!) wir es haben, wie das genant ist, vnd su^ellen Jn ouch denselben schaden mit sambt dem dienst vnd Houbtgu^et genczleich ablegen vnd gelten, wenn Si des nach der obgenannten vrist nicht lenger enpern wellent. Tet wir des ouch nicht, wa Si denne vnser aller vnuerschaidenleich vnd ouch vnsers igleichs besunderleich Hab und Gu^eter anchoment, oder darauf zaigent, Es sey in Steten, Maerkchten, dörffern, ouf Lannde oder ouf wazzer, do su^ellen Jn vnser Herren die Herczogen in O^esterreich oder ir Lanntmarschalich, oder Houbtman, oder wer im gewalt hat, an alles fu^erbot vnd an alle chlag vnd gericht phannt von antwu^ertten vnd Si der gewaltig machen, vnd in nutz vnd in gewer seczen vnd ouch darouf Schirmen, ze uerchouffen, zeuerseczen, wem Si wellen, vnd allen irn frv^emen damit ze schaffen wie Jn das allerpest chumpt vnd fu^egleich ist an alle irrung, alsuerr daz Si des vorgenanten irs geltes houbtguts vnd diensts, des wir Si denne ze richten schuldig sein, vnd alles des Schadens, den Si des denne habent genomen, als vorbenant ist, gancz vnd gar dauon gewert werden, wir sein lebentig oder tod. Ouch verpinden wir vns gegen dem oftgenanten Chadolten von WShing, vnd gegen seinen Erben oder wer den brief mit irm gu^etem willen innehat, das wir Jn das vorgenant gelt weder Houbtgu^et noch Dienst nyemant in vnserr gewalt verpieten, noch Jn chain bechv^ememu^ezz, oder irrung daran tu^en sullen lazzen, vnd ob es aber yemant in vnserr gewalt verpu^ot oder Jn dhain bechv^emernu^ezz oder irrung in vnser gewalt daran tu^en wolt des su^ellen Si allerding vnentkolten beleiben, vnd das mag ouch vns, gegen Jn nichts ledig gemachen wannd wir desselben geltes nicht anders su^ellen noch mu^egen von Jn ledig werden, vncz daz wir Si dez, selber genczleich gerichtet haben, vnd Jn das geantwürtt haben an allen irn schaden, an ein stat, wo Si das in dem Lannde ze Osterreich nemen wellent, alz vorgeschriben stet, oder daz Si des von vnserr hab verrichtet vnd gewert werdent als ouch vor begriffen ist, Vnd daru^eber so geben wir Jn den brief zu einem warn vrchu^end der sach versigilten mit vnserr obgenanten Rudolfs von Waltse, Wolfgangs von Wynnden, Albers von Ottenstain, O^etakchers des Wolfstains, Michels des V/ettendorffer, Hannsen Chu^etzkhofen vnd Hannsen des Hager angehangen Jnsigiln vnd wannd wir obgenanten, ich Reinprecht vnd ich Fridreich von Waltse zu der Zeit nicht aigener Jnsigiln haben, So verpinden wir vns vnder des vorgenanten vnsers Pru^oders Hern Rudolfs von Waltse vnd vnsers O^eheims Hern Wolfgangs vonn Wynnden Jnsigiln mit vnsern trewn angeuer alles das stet ze haben vnd ze laisten, das vor an dem (brief) geschriben stet, vnd wannd ich obgenanter Hanns von Hochenekk zu der zeit ouch nicht aigens Jnsigil han, so han ich mein Petschaft an den brief gehangen vnd verpind mich darunder vnd vnder der vorgenanten aller Jnsigiln mit meinen trewn angeuer, alles das ouch staet ze haben vnd ze laisten, das vor an dem brief geschrieben stet. Der geben ist ze Wienne nach Christes gepu^ert Drew tzehen hundert Jar darnach in dem Sechs vnd Sybenczgistem Jar des nechsten Freytags vor Sant Johannstag ze Sonnbenden +

Source Fulltext: OÖUB 9 (Wien 1906), S. 88-93