Jch Hainrich der Hekinger vnd Ann mein Haufraw(!) vnd all vnser erben veriehen offenbar mit dem prieff vnd tu^en chunt allen den di^e in sehent lesent oder horent lesen, dy nü lebent oder her nach chunftig werden, daz ich recht vnd redleich nach rad vnd mit gunst meyner Hausfraw^en nachsten Erben versaczt haben Lewpolten von Greyn vnd seiner Hausfrawn vnd allen i^ern paiden Erben zu^e der zeit ichs obgeschribner Hainrich der Hekinger vnd mein obgeschribne Hausfraw^e wolgetu^en machten i^er freys aygen vnd ir nachsten erben ayn Lehen daz hayzzet dacz dem Grezzyng vnd leit in Sand Gorger pharr mit allen den ern vnd nu^eczen als wir daz in aygens gewer selbn/e vnuersprochenleich inn haben gehabt, mit allew dye vnd dar zu^e gehort versu^echt vnd vnuersu^echt vmb Czwaynzich phunt phening Wyenner mu^enzz die sy vns berait, dar auf gelihen habent, der wir auch gancz vnd gar gewert seyn ann allen schaden, Vnd schullen auch sew den sacz inn haben an alle irrung, vnd nuczen als sew pest mu^egen, vnd wann sew wellent, so mu^egen sew inn vmb als vil phenning geseczen wem sew wellent, Wi^er sein auch vnd mit vns all vnser Erben, dez vorgeschriben satzes vnd dez Lehens ir vnd aller i^er erben Recht gewer vnd scherm, für alle ansprach, als freyz aygen vnd saczs Recht ist Jn dem Land ze Osterreich, Waz in oder i^ern erben dar an abget mit Recht, da sy schaden an nemen, den sy mugen gesprechen pey irn trewn vngeswarn, den selben schaden, vnd auch daz Hauptgüt schullen sy haben vnuerschaydenleich auf aller der Hab dy wir vnd all vnser erben haben, wo wi^er dy haben, Ez sy aygen oder verlehencz gut pu^erchrecht oder varnt gut, wy daz genant ist, vnd schullen seyn da von bechomen vnberecht, Jn welchem gericht sy dar auf choment, mit vnserm vnd aller vnser Erben vnd freunt gu^etleichem willen, wi^er seyn Lebentig oder Tod. dar zu^e schol auch seyn, vmb daz vorgenant gelt, dez Satzs Losung jaerlich an sand Gorgen Tag vnd zu chayner zeit merr, daz dy red steet vnd vnczebrochen beleib, dez gib ich vorgenanter Hainrich der Hekinger dem obgeschriben Lewpoltenn von Greyn vnd seiner Hausfraw^en vnd allen i^ern erben den offen prieff versigelten fu^er mich vnd fu^er all meyn Erben mit meym anhangunden Jnsigel, der wurt vnd dez Saczes sind zewg dy Erbem Hainrich der Ynczinger, Jans der Stayner vnd Herweich der Stayner mit im aller dreyer anhangunden Jnsigel inn an schaden. Der prief ist geben nach christi gepu^erd drew czehen Hundert Jar dar nach in dem Sechs vnd Sybenczkisten jar an dem Heligenn Sunwent Tag.

Source Fulltext: OÖUB 9 (Wien 1906), S. 100-101