JCh hainreich der Vreyi, vnd ich hans der Stainer vnd ich Marchart der La^erenhawser, vnd ich herweig der Stayner Wir vi'r virgehen offenleich mit dem brief vnd tu^en chunt allen den, di^e den brief hornt, sehent oder lesent, Daz hinder vns vorgeschriben vir gegangen Symon der wünberger vnd hainreich der ha^ekkinger Fridreichs dez ha^ekkinger pru^eder auf aynem tayl von der Chinder wegen, di^e Friedreich der ha^ekkinger lazzen hat, wi^e di^e genant sind, dafu^er si sich ga^enczleich habent angenomen, alles daz stat ze haben, daz hernach geschriben stet, vnd auf dem andern tayl Elspet Fridreichz dez ha^ekkinger witib vmb alle di chrieg vnd sto^ezz, di^e sev gegeneinander gehabt habent von der hab wegen, di^e Fridreich der ha^ekkinger hinder im lazzen hat, ez sey vmb varunde hab oder anli^egund gu^et vnd vmb der vorgeschriben Elspeten haimsteür oder geltschuld, di er hinder im lazzen hat, nach irr brief sag, di^e si daruber gehabt hat, daz wi^er daruber gesprochen haben minn vnd recht nach vnsern trewn. Sprech wir von erst mit verayntem mu^et vmb den Hof ze ho^erenpach, den si inn solt gehabt haben vncz an iren to^ed nach ires briefs sag, daz wir den Chinden gesprochen haben durch minn vnd durch trew, daz sev den vorgeschriben hof ze ho^erenpach ia^erleich ze losen habent, wann sev mugen oder einem andern der losung gunnen zwischen der liechtmezz vnd der vasnacht in der zeyt, auf welhen tag si wellent, vmb fumfczk phunt phening wienner mu^enzz. Ez sol auch di^e egenant vraw Elspet vnd ir wirt di vierczk phunt anlegen vnd sullen sev auch payde inn haben vnd nuczen vnuerchumert vncz an ir payder to^ed, darnach sullen sev hinwider geuallen auf di nachsten erben, di Fridreich der ha^ekkinger lazzen hat. Di^e andern zehen phunt, di mag si und ir wirt Peter der hewner geben, wem si wellent, wann sev Peter der hewner in gu^eten trewn fu^er di^e egenanten Chinder vergolten hat, da sev ir vater in geltschuld lazzen hat. Darnach so sprech wir alle varunde hab ledichleich der vörgenanten vrawn Elspeten, daz si iren frum damit mu^eg geschaffen, wi si wil. Darnach so sprech wir mer vmb daz lehen ze ho^ernpach, daz der vorgeschriben Fridreich der ha^ekkinger gechauft hat von dem Abt ze pawngartenperg vmb der egenanten vrawn Elspeten haimstewr, daz si daz ledichleich si vnd ir wirt peter der hewner sullen haben an alle ansprach vnd geben, wem fie wellent. Wir offen auch daz, daz Peter der hewner sein gelt darauf geben hat fu^er di egenanten chind, da sev in gelt schuld sind gewesen von ires vater wegen. Auch sprech wir, daz di vorgenant vraw Elspet vnd ir wirt gen ander hab, di di chinder habent, fu^erpas nichcz ze sprechen sullen haben mer, noch die chinder hingegen weder mit recht noch an recht. Wir vo^ergeschriben vir spruchlewt o^effen daz, daz wir auf payden taylen ir prieff darumb gehabt haben, was wir sprechen, da sol ez pey beleiben. Auch sprech wi^er, ob daz waer, daz di vo^ergenanten Chinder der vo^ergeschrieben spru^ech auz wolten gen oder aufgyengen, so sullen ez di obgeschriben Symon der Wunnberger vnd heinrich der ha^ekkinger gen den vorgenanten Chindern gancz vnd gar aufrichten der egenanten vrawn Elspeten vnd iren wi^ert an allen schaden. Wer aber dez aufgyeng, auf welhem tayl daz wa^er, daz wir gesprochen haben vnd oben an dem prieff geschriben stet, der wa^er veruallen dem andern tayl hundert phunt phening wienner mu^enzz vnd hyet alle seinev recht verlo^ern vnd den spruchlewten zway vnd dreyzich phunt phening auch wienner mu^enzz. Daz sich di^e handlung vnd di^e obgeschriben wart also vergangen haben vnd hinder vns vorgeschriben vi^er also chomen ist mit gu^eter v^erchund, dez Geb wir di^e obgeschriben vir spruchlewt den brief vesigilten mit vnsrer aller vir anhangunden jnsigeln. Der brief ist Geben nach Christs gepu^erd drewzehen hundert iar vnd darnach in dem Sechs vnd Sibenczkisten iar an sand Johannes Gocztawffer tag ze Sunebenden.

Source Fulltext: OÖUB 9 (Wien 1906), S. 98-100