In nomine domini Amen. per hoc Jnstrumentum publicum cunctis pateat evidenter, Quod Anno domini Millesimo Trecentesimo Septuagesimo sexto, Mensis Decembris die prima, hora quasi tertiarum, Jndictione XIIIJma pontificatus sanctissimi in Christo patris et domini domini Gregorij divina providentia pape XI. anno sexto, in mei notarii publici et testium subscriptorum presentia personaliter constitutus reverendissimus in Christo pater et Dominus meus, Dominus Pilgrimus sancte Salczburgensis Ecclesie archiepiscopus, apostolice Sedis Legatus, fecit, constituit et ordinavit suum verum legitimum et indubitatum procuratorem, Actorem negotiorum gestorem et nuntium specialem honorabilem virum Dominum Johannem Rectorem parrochialis Ecclesie in Raepp Pataviensis dyocesis, absentem tanquam presentem, dans et concedens dicto suo procuratori potestatem plenam et liberam et speciale mandatum, relaxationem, remissionem ac deductionem Subsidij tertie partis quamvis servitii, per ~~ Archiepiscopum Salczburgensem, in Romana Curia solvere consueti, quod nunc a dicto domino Pilgrimo Archiepiscopo per apostolicam Sedem exigitur, petendi et recipiendi et pro eodem subsidio, et qualibet ejus parte componendi, paciscendi, concordandi et obligendi penas Camere apostolice et alias quascunque spirituales et temporales, ac modos et formas obligationum ac solutionum terminos, sub quibuscunque verborum conceptionibus, in se et dictum dominum Constituentem assumendi, approbandi ratificandi, prorogandi et emologandi pro et super praemissis agendi et defendendi, iuratoriam, fideiussoriam, pignoraticiam et aliam quamlibet cautionem legitimam faciendi et recipiendi. Et generaliter omnia et singula modis et formis melioribus quibus de iure fieri poterit faciendi et exercendi, que in premissis aut aliquo premissorum principaliter, incidenter, sev emergenter neccessaria fuerint sev quomodolibet oportuna, etiam si maiora existerent superius expressatis et mandatum exigant speciale, promisitque dictus dominus constituens nomine suo, Ecclesie ac Successorum suorum, rata, grata et firma se perpetuo habiturum, quodcunque per dictum procuratorem suum, actum, gestum sev procuratum fuerit in premissis sev quolibet premissorum . Relevans idem dominus constituens prefatum suum procuratorem in hac parte, ab omni onere satisdandi, promisit mihi notario subscripto, tanquam persone publice, stipulanti et stipulationem sollempniter recipienti nomine omnium quorum itidem judicio sisti et judicatum solui, cum omnibus suis clausulis oportunis. Super quibus omnibus et singulis et quolibet premissorum, idem dominus constituens petiit per me notarium, sibi unum vel plura confici publica Jnstrumenta, Jpsumque sev ipsa, mea subscriptione consueta, ac suo pendenti Sigillo pro evidentiori omnium premissorum testimonio communiri . Acta sunt hec in Opido Tytmaning, Salzburgensis dyocesis in domo habitationis prefati domini Archiepiscopi in Stuba majori, Anno, mense, die, hora, Jndictione et Pontificatu, quibus supra, presentibus venerabilibus, viro, domino et Magistro Johanne de Pfarrchirchen licentiato in Decretis, canonico Pataviensi, prothonotario Curie Salzburgensis, Domino Johanne de Neitperg, Canonico Pataviensi in Lauffen, et domino Reichero in Rastat, Ecclesiarum plebanis Salzburgensis Dyocesis, testibus ad praemissa vocatis pariter et rogatis. Et ego Christanus dictus Guldein de frisaco clericus Salzburgensis dyocesis, publicus Jmperiali auctoritate Notarius, quia predicti procuratoris constitutioni et ordinationi, potestatis dationi, promissioni, releuationi et petitioni, ac omnibus aliis et singulis supradictis, unacum prenominatis testibus, presens interfui, vidi et audivi, ideo ea omnia et singula, in hanc publicam formam redacta, propria manu scripsi, signoque meo solito ac prefati Domini mei archiepiscopi Salzburgensis Sigillo pendenti presens Jnstrumentum signaui, requisitus et jussus in testimonium premissorum.

Source Fulltext: OÖUB 9 (Wien 1906), S. 170-171