ICH walchu^en der Cho^estel pu^erger ze Lintz vergich fu^er mich, mein hausfraw^een vnd fu^er alle mein erben vnd tun kund offenlich mit dem prief allen den, die in sehent, ho^ernt oder lesent, Das wir gelten schullen dem Erbern weschaiden Petern dem Vo^eln pu^erger ze Lintz, seiner hausfrawen vnd allen seinen eriben Dritthalbz vnd zwaintzch pfunt wienner pfening, die si vns du^erch trew^e vnd durch gut an rechten Ehaften no^eten werait gelihen vnd auf ir grozz schaden auz pracht habent durch vnsern willen, da mit wir vnsern Leibgeding prief vnd auch ander brief damit, der vor petern dez voln pfant ist gewesen vnd seiner erben, den wir in zu^e fremden handen pracht heten, mit dem obgenanten gelt wider von fremder hant gelo^est haben vnd haben in dem obgenanten petern dem Vo^eln vnd sein erben in geanttwurt fu^er daz obgenant gelt zu sampt der geltschuld, da si vor prief von vns vmb habent v^eber vnser Leibgeding, daz wir haben auf meins kern Hof von Saltzpu^erch, Vnd sullen auch den obgenanten meins hern hof von Saltzpu^erch inne haben, nu^etzen vnd niezzen nach allem irem fru^em vnd notdu^erften in allen den rechten ga^entzleich, alz wir in inne hieten mit hin lazzen oder ob sy selber wellent dar jnn sitzen, da habent si altzeit vnsern gu^eten willen zu, daz wir sie nichtz dar an irren sullen weder mit red noch mit werchen in dhainer weis vntz so lang, daz si haupgu^etz vnd schadens von vns wernd gericht gar vnd gantz alles geltz von dem brief, den si vor habent von vns zu^e sampt dem brief, den wir in yetzund geben vmb die obgenanten dritthalbz vnd zwaintzk pfunt, Vnd sullen auch die schaden, di si von vnsern wegen enphahent, von dez geltz wegen vnd auch von dez geltz wegen, da si vor prief von vns vmb habent, ga^entzlich an iren trewen sten, Swaz sy pei iren trewn an ayd vnd an recht sprechent, daz sullen si gantzlich haben auf vnserm obgenanten leibgeding, vnd ist auch getaidingt worden, ob ich zu^e vnsern notdu^erften ein pa^echhaws mit vnserm aygen gu^et setzen wellen, daz sullen wir setzen zwischen dez Ga^erten vnd dez Tor an die Mawer petern dem voln, sein erben vnd allem seinem gescha^eft in dem hof an allen schaden . wer aber, daz wir ichtz machten oder paueten, daz in oder dem gescha^eft in dem hof indert schad wer, daz sullen si vns wern vnd sullen ez vnder sten von tag ze Tag nach irem willen. Vnd ob daz wer, daz inndert ein sichtigev notdu^erft an dem obgenanten hof vnd haws wer ze pawen vnd ze pessern, daz sullen si alles pessern vnd machen mit einer gewissen vnd sullen daz selb gelt haben auf vnserm obgenanten leibgeding zu sampt dem andern obgenanten gelt, da si prief von vns vmb habent. Daz in die red stat vnd vnuerchert peleib, dar v^eber geben wir in den prief versigelt mit meinem anhangunden jnsigel vnd mit dez erbern weschaiden Fridrich des Kraft Richter die zeit vnd Mautter ze Lintz vnd Hainrich des Tamperiger purger ze Lintz paider anhangenden jnsigel, die si durch vnsrer vleizziger pet willen an den prief habent gelegt zu einer zevgnuzz in vnd iren erben an schaden, der geben ist nach christus gepurd dreutzehen hundert jar vnd in dem Siben vnd Sibentzkisten jar an sand Gregorij tag.

Source Fulltext: OÖUB 9 (Wien 1906), S. 217-219