Wir Graf Hainreich von Schawnberg vnd Gra^efinn Vrsel von Go^ertz sein Gemahel vnd eleich Wi^ertinn, veriehen vnd tu^en ku^ent offenleich mit disem brief, fu^er vns vnd alle vnser Erben ewichlich, wann wir dem Hochgebarn Fu^ersten Hertzog Leutpolten, Hertzogen zu osterreich, ze Steyr, zu Karenden vnd zw Krain, Grafen zu Tyrol etc: vnserm lieben genadigen Herren getrew vnd willig sein vnd im vnser hab lieber Gu^ennen dann iemand ander, haben wir im zu seinen vnd seiner Erben handen, nach gutem Rat vnd mit verdachtem Mu^ot, recht vnd redleich verchaufft vnd zu chauffen geben, vnser vest vnd vnsern Markcht ze Ort vnd gantze herschaft daselbs, vmb acht Tausent phunt wienner phenning, der si vnd ir Erben, vns vnd vnsern Erben, richten vnd bezaln su^ellen, auf irm tail an irr Mautt zu Lintz, in acht jaren, di sich schirst nach ein ander vergent, vnd nach dez briefs sag vnd weisung, den wir von in darumb haben, Also, daz der egenant vnser Herre hertzog Leutpolt vnd sein Erben, su^ellen nu^e hinfu^er, die egenanten vest, den Markcht vnd die herschaft zu Ort mit La^euten vnd Gu^etern, mit Kirichlehen, Manlehen, dorffern, ho^efen, Lehen, hu^eben, zehenden, Gerichten, velden, awen, diensten, zinsen, Stewrn, Pu^erchrechten, vberlend, wisen, a^ekchern, Pawnga^erten, vischwaiden, mit wazzern, wazzerru^ensen, mit wegen, Stegen, jngegen vnd aufgegen, besu^echt vnd vnbesu^echt vnd mit allen nu^etzen, rechten, eren, wi^erden, vnd gu^eten gewonhaiten, di darzu geho^ernt vnd alz wir der vorgenanter Graf hainreich von Schawnberch, vnd vnser vodern, die in nu^etzleicher gewer herbracht, gesezzen vnd genozzen haben, nichtz auzgenomen, an allez geua^erd vnd haben vns fu^er vnsselb, vnd vnser Erben verzigen, aller recht vnd Erbschaft, die wir daran gehabt haben, wann wir der, vnd aller gewer, die wir daran heten, haben dem obengenanten vnserm Herren Hertzog Leutpolten vnd seinen Erben, abgetreten, vnd yn die aufgeben mit aller schonhait vnd gezi^erd, die mit worten vnd geba^eren darzu^e geho^erent, vnd alz Landez recht ist, vnd wann wir die vorgenanten Gra^efinn Vrsel, vnser Morgengab, haimstewr, vnd widerleg auf derselben Herschaft zu Ort heten, haben wir vns auch fu^er vns selb, vnd all vnser Erben, derselben rechten ver¬zigen vnd verzeichen vns auch wizzenleich, zu dez obengenanten vnsers Herren Hertzog Leutpoltz vnd seiner Erben Handen vnd ob da wider, hie nach dhain brief fu^er ka^em, oder von iemand gezaiget würd, der sol tod vnd absein, vnd dem obengenanten vnserm Herren Hertzog Leutpolten vnd seinen Erben, an disem kauff dhain schad sein, in dhainem weg. Auch sey wir die vorgenanten Graf Hainreich von Schawnberch vnd gra^efinn Vrsel sein Gemahel dez egenanten vnsers Herrn Hertzog Leutpoltz vnd seiner Erben, der obengenanten vest, dez Markchts vnd der Herschaft zu Ortt vnd waz darzw geho^eret, nichtz aufgenomen, alz da vorgeschriben stet, recht geweren nach dez Landez recht vnd gewonhait zw Osterreich Also, ob jn mit recht icht daran abgieng, daz su^ellen si haben auf vns, vnd anderr vnserr Hab, wa di gelegen, oder wie die genant ist, an allez geuärd. Vnd daz diser kauff sta^et beleibe, hiezzen wir vnser bede jnsigel henken an disen brief, vnd zu bezzer zeugnu^ezz vnd sicherhait, haben wir gebeten vnsern lieben O^ehaim Wernharten von Meissaw zu den zeiten Lantmarschalich in Osterreich vnd Kadolten von Ekchartzaw den Elteren, daz si ire jnsigel zu sambt den vnsern an disen brief gehenkt habent. Geben zu Wienn an Mitichen nach vnser frawen tag zu Herbst Nach krists gebu^erd dreutzehenhundert jar, darnach in dem Siben vnd Sibentzigisten Jare.

Source Fulltext: OÖUB 9 (Wien 1906), S. 310-312