Ich Dyetreich der Tewrwanger ze Chrotendorf vnd mein Hauzzfraw Wandelmu^ot vnd mit sampt vns all vnser eriben vnd ich Dyetreich der Tewrwanger ze Lawtach vnd all mein eriben, vergehen, vnd tu^on chv^ont Offenwar mit dem gegenbu^ertigen prief allen den, di den brief an sehent oder hörent lesen, daz wir mit wolbedachtem mu^ot vnd mit guetleichem willen vnd wort aller vnser eriben vnd nach rat vnd weisung vnserer nachsten vnd pestten vrewnt ze der zeit do wir daz wol getu^on mochten, mit vogtz Hant vnd mit aller stet rechtt vnd redleich verchawfft haben, vnserew zwai gu^ot di genant sind in der O^ed, gelegen in Chirichaymer pharr, di unser rechtt aygen, gewesen sind, von dem edln, Hochgeborn fu^ersten dem Herczogen ze O^estereich vnd geho^erent in di vogtay gein Wels Di selben, obgnanten, zwai gu^et haben wir ze chawffen geben dem erbern mann Vlreichen dem Chrama^er purger ze Gmunden vnd seiner Hauzzfrawn, vnd allen iren eriben, di si habent oder chu^enftikchleich gewinnent, wie di genant sind, vmb ein gelt dez wir gar vnd gaentzleich von in gericht vnd gewert sein, an allen vnsern schaden. Wir haben auch in, di vorbenanten, zwai gu^ot geben vnd ingeantwürtt ze einem rechten chawff auz vnser nu^ocz vnd gewer in ir nu^ecz vnd gwer, vnd auch mit allen den ern, nu^oczen vnd rechten di zu den vorbenanten zwain gu^etern geho^ernt vnd do von becho^emen megen, ze holcz, vnd ze velld vnd ze wismad oder wie daz genant ist besu^echt vnd vnbesu^echt in aller der mazz vnd ern, alz wir di gu^ot selb ynne gehabtt vnd genozzen haben, vnd alz si von alter her cho^emen sind. Wir schu^ellen vnd wellen auch der vorbenanten Gu^eter vnd dez Chawffs dar auff ir gewer vnd fu^erstant sein für allew ansprach wo vnd wonn in dez not vnd durft geschiecht, also der Vogtay recht ist ze Wels. Wer aber daz in an der gewerschaft vnd an dem Chawff mit dem recht icht abgieng, wie sich daz fu^egt, wyettann schaden si dez naemen, den ir ayns gesprechen mag pey seinen trewn an ayd vnd an recht, den selben schaden allen schu^ellen wir in gaenczleich ab tv^on vnd wider chern an allew wider red vnd an alz recht vnd schullen si daz haben vnd gewartent sein dacz vns vnd dacz vnsern trewn vnd auf aller vnser Hab wo wir di haben oder lazzen, oder wie di genant ist besu^ocht vnd vnbesu^ocht, Daz in di red also stet vnd vnuerchert beleib, Dar über ze einem warn vnd steten vrchund geben wir in den brief versigelten mit meins obgenanten Dyetreichs des Tewrwanger ze Chrotendorf anhangundem Jnsigel vnd ze einer güten besta^etigung mit dez erbern Ritter anhangundem Jnsigel Hern Hannsen dez Chu^etzchofen yem schaden, der zu den zeiten gewaltiger Vogt ze Wels gewesen ist, mit dez willen vnd Hant der chawf bestett vnd geschehen ist, Vnd mit vnser lyeben Vetern anhangunden Jnsigeln Wernharcz vnd Meynharcz der Tewrwanger, di si durich vnser vleizzigen pet willen ze einer zewgnüzz an den brief habent gelegt in an schaden. So verpind ich mich obgenanter Dyetreich Tewrwanger von Lawtach vnder di vorbenanten Jnsigel mit meinen trewn allez daz sta^et ze haben daz an dem brief verschriben stet, wand ich selb dhayn Jnsigel nicht enhet. Der prief ist geben, do man zalt von Christi gepu^ertt Drewtzehen Hundert jar, dar nach in dem Siben vnd Su^entziksten Jar dez freytags vor sand Michelstag.

Source Fulltext: OÖUB 9 (Wien 1906), S. 317-319