Ich Chvnrad der Veldpekch, mein hausfraw vnd all vnser erben veriehen offenlich mit dem brif allen den, di in sehent oder ho^erent lesen, daz wir Recht vnd Redlich ze chauffen Geben haben vnsrev nachgeschribnev gu^et ze Teistet. zu dem erstn den hof, da chvnrad der alt Mavrer auf ist gesezzen, di zway gu^et, da der alt fuchs ist auff gesezzen, daz gu^et, da der Gra^esel auf ist gesezzen, daz gu^et, da der hawa^er ist auf gesezzen, daz gu^et, da der alt Chriechel ist auf gesezzen, daz gu^et, da der jung chriechel ist auf gesezzen vnd auch paid Mu^el, di ober vnd di nider vnd auch allez daz, daz wir daselbs ze Teistet haben, wie daz allez genant ist, bay chlain vnd bay grozz nichcz ausgenomen mit allen den eren, rechten, nu^eczen vnd gesuchen, di darczue geho^ernt besu^ocht vnd vnbesucht, in aller der mazz, als wirs vnd vnser fordern her pracht vnd ynn haben gehabt, vnsern liben herren hern Chvnraden vnd hern ha^ertneiden bru^edern den Chuchlern vnd allen irn erben umb fu^enf vnd achczk phunt wienner phenning, der wir gar vnd gancz an allen schaden von in gewert sein vnd haben in auch di obgenanten gu^et allev mit aller zu^egeho^erung ein geantwurtt auz vnserer Nu^ecz vnd gewer in ir nucz vnd gewer vnd mit aller der besta^ett, der si darczu^e bedu^erffent alzo, daz wir noch vnser erben noch andrer niemant von vnsern wegen hincz in noch hincz iren erben von der obgenanten gu^et vnd von des chauffes wegen nimmer mer nichcz ze fordern noch zu sprechen su^ellen haben mit chainer lay rechten noch in chainer weis, daz in dar inn zu schaden cho^em. Auch sulln wir der obgenanten gu^et allerr ir recht su^erstant vnd gewern sein vor aller ansprach vnd zu dem rechten vertreten, wo in dez not geschicht vnd alls des lands recht ist an allez geua^er. Taten wir dez nicht, wittan schaden si dez na^emen, den su^ellen wir in abtuen vnd sullen daz haben daz vns vnd auf allerr vnserer hab, wo wir di haben. Auch daz gu^et, da der Parta^er ze Teistet ist auf gesezzen, haben wir in zu chauffen geben die losung, dy wir dar auff haben, daz si ez wol gelo^esen mu^egen. vnd zu ainem waren vrchunt Geben wir in den offen brif mit meinem obgenancz Chunrads dez veltpekchen anhangundem jnsigel vnd zu einer pessern sicherhait vnd geczeugnu^ezz mit Hainreichs dez Scho^enawa^er anhangunden jnsigel besigelten, der daz durich vnserer pet willen an den brif gelegt hat im vnd seinen erben an schaden, darvnder wir vns auch verpinten allez daz sta^et zu halten, daz an dem brief ist verschriben vnd der auch Geben ist nach Gots gepu^erd drevczehen hundert iar vnd dar nach in dem Siben vnd Sibenczkisten iar an sand Michels tag in dem heribst.

Source Fulltext: OÖUB 9 (Wien 1906), S. 325-326