Wir Graf Hainreich zw Schawnberch vnd alle vnser Erben vnd Nachkomen, Bechennen offenleich mit dem brief allen den, die in sehent, hörent oder lesent, Daz der Erber Herre Her Vlreich der Freitel Pfarrer dez Gotzhauses dacz sand Giligen, enhalb der Ynprukk zw Pazzaw, bey vns gewesen ist, Vnd hat vns vnder weiset, der freyung, die daz vorbenant Goczhau^os, an vnsrer Mau^ott zu Aschach von vnsern vodern gehabt hat. Nu sullen vnd wellen wir Gotzgab vnd gu^ote werich die vnser vodern vncz an vns geben vnd gehandelt haben, nicht ab nemen, sunderleich bezzern, vnd haben angesehen, daz sich der oben genant Pfarrer vnd sein vodern vns vnd vnsern uodern andähtigleich erzaiget habent. Vnd haben dem vorgenanten Goczhaus die freyung vernewet, dürch Got und dürch besünder genad. Also daz wir dem vorgenanten Pfarrer dacz sand Gilgen vnd allen seinen Nachkommen, di Pfarrer da sind vnd dem selben Erbern Goczhaus Ewichleich gancz freyung vnd fürfart, an alle Mav^ott vnd voderung ze Aschach gegeben haben in alle der mazz als si andre Goczhau^eser von vnsern voruodern vnd von vns habent. Allem dem, dez si bedürffen, Ez sey Trayd oder Wein, oder waz daz ist, daz si fürent oder gefüren mügen, oder wellent, hinnaw oder wider wazzer, daz dem selben Goczhavs vnd den siechen da selben in irm rechten aygen wirt, daz si heut zu tag habent, oder fürbaz gewinnent in Osterreich, oder in Bayrn, Du^erch die beschaidenheit vnd in der Mainv^eng, daz der oben genant Her Vlreich der selb Pfarrer ze sand Giligen vnd all sein nachkomen, die da selben Pfarrer sind, alle Jar ewichleich mit gütleichem willen vnsers lieben Herren vnd Vater Graf Hainreichs von Schawnberch, dem Got genad, vnd auch vnser vnd allez vnsers geslähtez, Sei Hügnüzz vnd Jartag begen süllen, mit Vigilij vnd mit Selmezzen, dez nachsten Montagez nach sand Jacobs tag vnd dez selben tages sol her Vlreich der vorgenant Pfarrer oder sein nachkomen vier Mezz haben an gevärd, oder dar nach des nachsten tagez oder an dem dritten tag süllen die selben vier Mezz allerding volpracht vnd begangen werden, mit vier briedern vnd ie dem selben Herren vnder den vier briestern sol der vorgenant Pfarrer oder sein Nachkomen zwelif pfenning geben Pazzaw^oer mu^enzz, Vnd dar zu sol der selb Pfarrer oder sein Nachkomen geben iedem siechen in dem Siech haus dacz sand Gilgen. dez selben tagez daz die Pfru^ent hat aller Järlich vier pfenning zu^o einer rechten Pfru^ent zu Hail vnd zu Trost allen vnsern vnd vnsers geslächtez Selen. Würd daz übervaren vnd nicht volfürt, alz oben geschriben ist, So hat sich die vorgenant freyung vnd daz Recht, die daz vorgenant gotzhaus vnd Her Vlreich der Pfarrer vnd sein Nachkomen dacz sand Giligen, dacz Aschach, an der Mau^ott stat habent¹⁾ allerding her wider freies vnd ledichleich an allen fürzokch zu^o vns vnd in allez vnsers geslächtez gewalt von Schawnberch vervallen. Daz der gewerft vnd die freyung also stät vnd vnczebrochen beleib, dar über geben wir dem vorgenanten Pfarrer Hern Vlreichen vns seinen Nachkomen vnd irm Goczhaus dacz sand Gilgen disen brief ze einem ewigen vrchu^end. mit vnserm grozzen anhangundem Jnsigel besigelten. Die Newung ist geschehen nach kristi gebu^erd Dreu czehen Hu^ondert Jar, vnd in dem siben vnd Sibenczigisten Jar. an sand Michels tag.

Source Fulltext: OÖUB 9 (Wien 1906), S. 322-324