Wir piligreim von gottes gnaden Ertzbischolue zw Saltzburg Legatt des Stuls zw Rom veriechen offenlich mit dem brief, Das wir mit wolbedachtem mutt vnd nach ratt vnsers Rates vnns veraintlich, getrewlich vnd an alles geua^er verpunden haben vnd verpinnden vnns auch mit dem brief zw dem Hochgeboren Graf hainreichen von Schawnberg Jm ze helffen mit allem vnserm vermu^egen vnd angeua^er, als offt vnd als dikch in des nottgeschiecht vnd das an vnns vordertt vnd begertt, vnd sullen wir das in dhainerlay weis nicht widersprechen noch widerreden. Zw gleicher weis sol er vnns vnd vnserm gotzhaws geholffen sein mit allem seinem vermu^ogen trewlich vnd an alles geua^er, als offt vnd als dick wir das an Jn vordern vnd begeret sein, vnd sol das von im in kainerlay weis widersprochen werden. Es ist auch getaidingtt: Ob das gescheche, das von kriegen vnser lannd vnd lewtt notdurfft wegen ze paiderseitt von vnns baiden vest vnd geslos, wie die genant wa^eren, genott wurdenn oder von vnns vnd den vnsern geuangen genumen, die vnd diselbigen sullen wir getreulich mit ainander tailen aber an alles geua^er. Es soll auch yedweder tail dem andern hellffen auf seinselbers kost vnd in aller der mas vnd weis, als obengeschriben stett, vnd die obgeschriben puntnus vestigclich sta^ett halten wider aller manigclichen nyemant ausgenomen, denn allain den Heiligen stull zw Rom, das heilig Romisch reich vnd den Erwyrdigen vnsern lieben frewndt Herrn lamprechten Bischolffen zw Babenberig, die Hochgeporen fursten vnser lieb frewnd Herrn albrechten, Herrn leutolden Hertzogen zw Osterreich etc. vnd den hochgepornn Graf Meinhartten von gortz. Verhaiffen vnd geloben wir die obgeschriben puntnus vnd taiding stett zw hallten mit vnsern trewn an aydes statt von dem nagsten sand Jorigen, der schiristist kumbt, vber ain gantz Jar. Sich sol auch yeweder taill mit den veinden weder berichten noch frid hallten an des andern wissen vnd willenn vnd an sein ratt. Vnd daruber ze vrkund geben wir den brief versigelten mit vnserm anhangunden Jnnsigl, Der geben ist ze Saltzburgk an sand Bartlmens tag des Zweillfpottn Nach Kristi gepu^ord drewzechenhundertt vnd darnach in dem Siben vnd sibentzigissten Jarenn.

Source Fulltext: OÖUB 9 (Wien 1906),S. 300-301