Wir Johanns Lantgrafe zu dem Leütenberg vnd Graf zu Hals für vns vnd alle vnser erben, Bechennen —, daz wir — mit gesundem leib güter vernunft vnd vnbezungen, der zwayer vesten Ernek vnd Ratzenhofen, mit iren gutem vnd zugehörenden di allayn in der Herren Land von bayern ligend vnd auch aller ansprach, Rechte, Vorderung vnd Züversicht, di wir zu denselbn Vesten vnd iren zugehörenden bis her gehabt haben, oder ir haben möhten, oder di vns in dhain weise gebu^erent, Vns verzigen haben vnd verzeihen vns der mit rechter wissen in Chraft ditz briefs, vnd haben ir genczlich abgetreten, Treten ir ab, vnd haben si geweist, vnd weisen si mit disem briefe erblich vnd ledichlich an die Hochgeboren Fürsten vnd Herren Hern Otten des heiligen Richs Ertzkamrer kurfürste, Hern Stephan, Hern Fridrich vnd Hern Johannsen gebrüdern des egenanten Hern Otten Vettern all pfallentzgrafen by Rein vnd Hertzogen in bayern zc. vnsern besundern liben Herren vnd an ir erben. Vnd geloben für vns vnd alle vnser erben in guten getrewen an alles geuerd vnd argenlist, daz wir vnser erben noch niemant anders von vnsern wegen nach den egenanten||
vesten iren gütern vnd zugehörnden di allayn in der egenanten Herren von bayern Land gelegen sein, nymmermer mit dhainerlay wege mit Gaistlichen noch weltlichem gericht, Mit Worten oder mit werchen, Stellen noch sten süllen vnd auch dhainerlaj ansprach rechte oder vorderung, fürbas dar zü haben süllen noch wellen in dhain weise angeuerd, Mit vrchunde ditz briefs versigelt mit vnsserm anhangendem Jnsigel der geben ist zu||
Nüremberg am Montag vor sand kilian tag nach Christes gebürt Drewtzehen hundert jar vnd in dem Siben vnd Sibentzigistem Jare.

Source Fulltext: OÖUB 9 (Wien 1906), S. 275-276